Viti 1991 – Baton Haxhiu pyet Millosheviçin: Kur do largoheni nga mitologjia e shekullit 19 dhe shqiptarëve t’u mundësohet e drejta që u takon, Republika e vet?

Ishte 6 mars, viti 1991.

Në Brdo të Kranj të Sllovenisë ishin mbledhur kryetarët e Republikave të Jugosllavisë.

Ishte ky takimi i fundit i modelit të konferencave që Republikat kishin krijuar për të biseduar rreth së ardhmes së Federatës. Në pajtim të plotë mes vete, kryetarët kishin përjashtuar delegacionet e Kosovës e të Vojvodinës.

Megjithatë, gazetarët ishte e pamundur të përjashtoheshin nga konferenca për media. Prandaj gazetari i ri nga Kosova, Baton Haxhiu, 26-vjeçar, shfrytëzoi mundësinë për të bërë pyetje për liderin e kroatëve, Franjo Tudjman, dhe atë serb, Slobodan Millosheviç.

Haxhiu përfaqësonte javoren “Epoka”, të themeluar nga gazetari Migjen Kelmendi.

Në konferencë, afër Haxhiut, shihet edhe gazetarja Besa Çeku, gazetare e RTP-së në Zagreb e programit në gjuhën shqipe.

Para konferencës, me insistimin e një tjetër gazetari, Halil Matoshit, Haxhiu kishte shpërndarë “Ekspozitën e tmerrit” të botuar në gazetën javore atëherë “Zëri”.

Gazetarët e pranishëm kishin në dorë këtë numër të gazetës “Zëri” që fliste për vrasjet e policisë serbe në Kosovë.

Takimi i radhës ishte mbajtur në Bosnje, por meqë kishte përfunduar pa marrëveshje, s’pati as konferencë për media.

Pas atij takimi, të radhës nuk pati.

Në Bosnje filloi lufta dhe përfundimisht shpërbërja e Jugosllavisë.

Në video është momenti i dy pyetjeve të Haxhiut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.