Ministrja e Shëndetësisë dhe e Mbrojtjes Sociale, Ogerta Manastirliu, ka inspektuar procesin e vaksinimit, të martën në Qendrën e Vaksinimit në Arenën Kombëtarë.
Ekipi i Urgjencës Kombëtare dhe mjekët e familjes në Tiranë, janë ata që po vaksinohen me dozën e parë të vaksinës antiCOVID, sipas planit të Qeverisë. Ndërsa vijon vaksinimi me dozën e dytë të mjekëve të QSUT dhe disa spitaleve bashkiake.
“Brenda kësaj jave do të përmbyllet vaksinimi i mjekëve të familjes pastaj do të zhvillohet procesi i vaksinimi me të gjithë stafin mjekësor”, është shprehur Manastirliu.
Ministrja ka njoftuar se procesi i vaksinimit do të vijojë me të moshuarit ku do të vaksinohen të gjithë të moshuarit me moshën mbi 80 vjeç. Mjekët e familjes do të njoftojnë të moshuarit për fashave të ndara sipas grupmoshës dhe sipas sëmundshmërisë.
