Bashkia e Shkodrës ka njoftuar mëngjesin e 12 janarit se situata e përmbytjeve vijon të jetë e rënduar.
“Nga monitorimi periodik në terren ditën e sotme datë 12.01.2021, në orën 08.30, situata e përmbytjeve në terren vazhdon të jetë si më poshtë: Hidrometri në Dajç në orën 08:30, shënon kuotën 6.46 metra, hidrometri i Liqenit të Shkodrës shënon kuotën 8.67 metra dhe hidrometri i lumit Drin shënon kuotën 7.07 metra”, deklaroi Bashkia e Shkodrës.
Sipas bashkisë, janë 1 mijë e 903 hektarë sipërfaqje totale e përmbytur. Në krahasim me një ditë më parë, situata e përmbytjeve ka pësuar rritje. Më datë 11 janar numëroheshin 1 mijë e 823 sipërfaqje tokë e përmbytur.
Njoftohet se rruga për në Obot është e bllokuar për mjetet e ulëta. Ajo është e kalueshme vetëm me mjete të larta, pasi niveli i ujit mbi rrugë arrin mbi 80-të centimetra.
Për shkak të rritjes së nivelit të ujit është bllokuar segmenti në vendin e quajtur “Urrelat”, që lidh fshatin Shirq me Darragjat.
Vazhdon të ketë rrëshqitje dherash edhe në rrugën Baks-Rrjoll, në të cilën po punohet për pastrimin e saj.
Në njoftim thuhet se vazhdon gërryerja e tokës bujqësore nga lumi Kir në vendin e quajtur “Bardhaj”.
Bashkia shtoi se ka rritje të nivelit të ujit të Liqenit të Shkodrës, në zonën e Livadeve dhe Dobraç.
Rikujtojmë se për shkak të prurjeve ujore të janarit të vitit 2010-të, në qarkun e Shkodrës u përmbytën sipërfaqje të konsiderueshme toke, si dhe disa akse rrugore si: Autostrada Kukës-Tiranë dhe Qafë-Shllak-Kukës, të cilat u bllokuan përkohësisht nga shkarjet masive.
Prurjet e tepërta të ujit rritën nivelin e tij deri në mbi një metër në disa zona. Më të rrezikuarit, siç janë edhe edhe në situatën e përmbytjeve të vitit 2021, ishin banorët e dy komunave Dajc dhe Ana e Malit.
Nga një vlerësim paraprak u përmbytën rreth 600 hektar tokë në rajonin nr.1 të Shkodrës.
Në lagjen “Ajasem”, “Bahçallëk” dhe “Tophane”, u evakuan nga zona e përmbytjes 37-të familje.
Situata më emergjente u paraqitet në Obot e Dajc. Fshati Obot ka qenë totalisht i izoluar nga uji, Sipas vlerësimit paraprak u përmbytën rreth 850 hektar tokë në këtë fshat, 130 shtëpi në fshatin Obot u përmbytën, nga të cilat 5 familje u evakuan.
Në komunën Dajç u përmbytën rreth 1000 hektar tokë bujqësore dhe në prezencë uji u ndodhën 70-të banesa. U evakuan 53 familje.
Fshatrat nuk patën energji elektrike, pasi koorporata e pati ndërprerë për të evituar fatkeqësitë për shkak të lagështisë së madhe. Banorët u izoluan në shtëpitë e tyre dhe për të dalë prej tyre përdorin varkat.
Autoritet shtetërore shpallën gjendjen e jashtëzakonshme në disa komuna të rrethit të Shkodrës, si shkak i përmbytjeve./AlbanianPost.com
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
