![](https://albanianpost.com/wp-content/uploads/2024/07/5325525.gif)
Personi që tentoi të vriste ish-presidentin amerikan Donald Trump tanimë është identifikuar.
Është 20-vjeçari Thomas Matthew Crooks, sipas një deklarate të FBI-së.
Crooks mësohet se është nga Bethel Park i Pensilvanisë, një qytet rreth 70 km nga Butler, vendi i tentativës për vrasje.
“Ky mbetet një hetim aktiv dhe në vazhdim dhe kushdo që ka informacion që mund të ndihmojë në hetim inkurajohet të dërgojë foto ose video në internet”, shtohet në deklaratë.
Policia e Pensilvanisë ka bërë me dije sakaq se nuk ka monitoruar kërcënime të mëtejshme pas atentatit.
Ndërkohë, oficeri i FBI-së Kevin Rojek ka konfirmuar se incidenti ndaj Trump po trajtohet si një atentat.
“Këtë mbrëmje patëm atë që ne e quajmë një atentat ndaj ish-presidentit tonë Donald J Trump”, ka thënë ai.
“Është ende një skenë aktive krimi”, ka shtuar ai, duke theksuar se ata kishin një numër agjentësh në vendngjarje që hetonin incidentin.
Trump, i ka shpëtuar atij çfarë besohet të ketë qenë një atentat ndaj tij në një tubim të mbajtur në Pennsylvania, teksa autori është neutralizuar, por një person pjesëmarrës ka mbetur i vrarë.
Një ngjarje kaotike e zhvilluar në pak sekonda ka qenë ajo e tubimit të Trump gjatë mbrëmjes së të shtunës (orët e para të mëngjesit në Shqipëri), ku fillimisht, teksa Trump po fliste, u dëgjuan disa të shtëna.
Në një video, e cila qarkulloi menjëherë në mediat tradicional dhe ato sociale, Trump duket teksa vendos dorën në veshin e djathtë dhe më pas shërbimet sekrete ndërhyjnë duke e shtrirë në tokë dhe duke iu hedhur sipër.
Disa të shtëna të tjera vijojnë të dëgjohen, derisa ndalojnë në fragment sekondi.
Trump më pas çohet në këmbë me katër anëtarë të shërbimeve sekrete, të cilët e rrethojnë atë dhe një shenjë demonstrative, i gjakosur në pjesën e djathtë të fytyrës, ngre grushtin lart, duke përjetësuar një shkrepje, e cila bëhet menjëherë faqe e parë e mediave botërore, nën titullin “Trump i shpëton të shtënave në Pennsylvania”.
I nxjerrë jashtë skenës në mënyrë të menjëhershme, ish-presidenti amerikan konfirmohet menjëherë se është plagosur lehtë, por në gjendje të mirë, pa specifikuar asgjë më tej.
Misteri rrethon ngjarjen, derisa është Prokurori i distriktit ku Trump po zhvillonte tubimin, Richard Goldinger, ai i cili zbardh ngjarjen.
“Një anëtar i audiencës dhe personi i armatosur kanë vdekur pas një të shtëna në mitingun e ish-presidentit Donald Trump në Pennsylvania”, sipas Prokurorit të Qarkut të Butler, Richard Goldinger.
Prokurori i qarkut tha gjithashtu se Trump do të jetë mirë dhe u largua nga Shërbimi Sekret Amerikan. Zyrtari tha se një spektator i dytë është në gjendje të rëndë.
Menjëherë më pas, Shërbimet Sekrete amerikane dalin me njoftimin se janë ato, të cilat e kanë neutralizuar autorin e dyshuar të ngjarjes dhe sqarojnë se një person tjetër nga audienca ka mbetur i vrarë.
E gjithë ngjarje ndërkohë, sipas të njëjtit burim, po hetohet si një tentativë e mundshme vrasjeje kundrejt Trump.
Tre burime të zbatimit të ligjit konfirmojnë se vrasësi ishte jashtë vendit të tubimit të ish-presidentit Donald Trump në Pennsylvania.
Dy nga këto burime thonë se vrasësi ishte në një çati, jashtë vendit të ngjarjes. Burime të shumta të zbatimit të ligjit e kanë cilësuar këtë individ si snajper, megjithëse detaje shtesë për këtë nuk janë të qarta.
Prokurori i Qarkut të Butlerit, Richard Goldinger tha se ai u tha nga kryedetektivi i tij se vrasësi ishte në një ndërtesë ngjitur me pronën dhe nuk kishte detaje shtesë për personin.
Detaje të reja priten në vijim.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com