Vidovdani kalon pa incidente, një person u arrestua nga policia

Policia e Kosovës ka bërë të ditur se kremtimi i festivalit Vidovdan ka kaluar pa inicidente, ndërsa është arrestuar një person për intervistim për shkak se ka ndikuar në mbarëvajtjen e këtij manifestimi.

Lajmin e ka bërë të ditur policia përmes një komunikate për media.

“Referuar informacioneve nga njësitet e angazhuar policore në teren nuk është raportuar asnjë rast i cili ka ndikuar në mbarëvajtjen e manifestimeve, përveç shoqërimit të një personi në stacion policor për intervistim sipas procedurave ligjore”, thuhet në komunikatën e policisë.

Në njoftim sqarohet se pas përfundimit të aktiviteteve në orët e pasdites të gjithë pjesëmarrësit janë shpërndarë të qetë.

“Policia e Kosovës mbetet e përkushtuar në realizimin e detyrave dhe autorizimeve të saj ligjore, menaxhimin e situatës së sigurisë, zbatimin e Kushtetutës së RKS-së në funksion të garantimit të një mjedisi të qetë e të sigurt për të gjithë qytetarët pa dallim”.

Festivali Vidovdan është një festë e rëndësishme për serbët, e cila shënohet më 28 qershor.

Beteja e Kosovës u zhvillua më vitin 1389, në Fushë Kosovë, saktësisht 635 vite më parë.

Ishte një betejë në mes të aleancës ballkanike dhe Perandorisë Osmane, që ishte përmbyllur me fitoren e këtyre të fundit.

Përkundër se ballkanasit kishin krijuar një koalicion, historiografia serbe ka tentuar që ta përvetësojë këtë betejë.

Për ta rritur edhe më tej rëndësinë e kësaj dite, siç e quajnë ata Vidovdanin, Serbia e ka shpallur edhe si festë zyrtare nacionale për të gjithë popullin serb 28 qershorin, duke tentuar kështu që ta argumentojnë narracionin e tyre “për të drejtën mbi Kosovën”.

“Vidovdani”, përralla serbe që shkakton luftëra në Ballkan – çka realisht ngjau para 635 vjetësh?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.