Shqipëria

Çfarë ndodhi, përtej, në Lalëz?


Mbrëmjen e 1 gushtit 2021, një seri prej shtatë shtëpish janë vjedhur dhe dëmtuar në Gjirin e Lalëzit. Nga raportimet e para dyshohej se një nga këto shtëpi të dëmtuara dhe potencialisht të vjedhura, ishte edhe shtëpia e kreut të Prokurorisë së Posaçme kundër Krimit të Organizuar dhe Korrupsionit (SPAK), Arben Kraja.

Por çfarë ndodhi konkretisht në Lalëz gjatë asaj nate dhe natës pasuese?

Disa mjete të Policisë së Shtetit, janë pikasur në banesat e vjedhura. Një pjesë e mjeteve, ka qenë e vendosur pikërisht përpara hyrjes së shtëpisë së zotit Kraja.

Për këtë arsye, banorët për rreth kanë menduar se banesa e tij ka qenë pjesë e godinave, në të cilat hajdutët kanë hyrë dhe kanë kryer vjedhje.

Ndërkaq, në rrugë zyrtare, nuk ka pasur një denoncim nga ana e Krajës për ngjarjen. Ndaj, organet policore, të pyetur nga Albanian Post mbi vjedhjet e shtëpive në Lalëz, janë përgjigjur se “nuk ka informacion mbi të tilla akte në banesën e zotit Kraja”.

Gjithsesi, banorë të zonës, e konfirmojnë për Albanian Post se shtëpia e Krajës është minimalisht e dëmtuar, por nuk dihet nëse është vjedhur apo jo gjë brenda saj. Vetë Kraja nuk ka raportuar vjedhje.

Çfarë u raportua mbrëmjen e 2 gushtit?

Shtatë shtëpi, mes të cilave ajo e kreut të Prokurorisë së Posaçme kundër Krimit të Organizuar dhe Korrupsionit (SPAK), Arben Kraja, janë dëmtuar dhe është dyshuar për vjedhje mbrëmjen e djeshme në Gjirin e Lalëzit, teksa rrethanat ende nuk janë bërë të ditura.

Burime pranë Albanian Post, bëjnë me dije se në shtatë shtëpitë ka pasur prani policore për të zbardhur vandalizimin dhe vjedhjet e mundshme, me shtim të vazhdueshëm të pranisë që prej njoftimit të parë. Nuk dihet ndërkaq nëse shtëpia e Krajës është dëmtuar qëllimisht apo ka qenë thjesht rastësi.

Policia e Durrësit gjithsesi, ende nuk e ka konfirmuar ngjarjen.

Një prej pronarëve të shtëpive, grabitësit i kanë vjedhur kuletën teksa ka qenë në gjumë. Ndërsa kartat e identitetit janë hedhur në oborrin e shtëpisë dhe vetëm paratë janë marrë me vete.

Raportimet ndërkaq siç mësohet nga banorët e zonës, janë se kjo nuk është nata e parë kur kryhen vjedhje. Ngjarje të tilla ka pasur edhe në ditët paraardhëse.

Mësohet se pre e grabitjeve kanë qenë rreth tre ose katër shtëpi, dy mbrëmje më parë. Një prej dëshmitarëve, ka bërë me dije për Albanian Post se grabitësit janë futur nga dritarja.

Së bashku me familjarët, personi i është drejtuar banesës rreth orës 02.30 të natës. Në çastin e hyrjes për në banesë, ai ka parë se një prej dritareve ka qenë e hapur. Ndërkohë skema është e njëjtë: Personit i janë vjedhur paratë nga portofoli dhe disa sende me vlerë, ndërsa kartat e ndryshme janë hedhur në oborrin e shtëpisë.

Kjo situatë ka krijuar shqetësim të madh në komunitet, duke çuar banorët në gjendje paniku dhe pasigurie.

/Albanianpost.com


Lajmet kryesore