Vetëm 8 shkolla pranuan të kthehen në qendra vendvotimi në Veri – mbetet të caktohen edhe 11 vendvotime te tjera

Ndryshe nga vitet e kaluara që ishin 44 qendra të votimit në shkolla për katër komunat veriore, në zgjedhjet që do të mbahen më 23 prill në Mitrovicë të Veriut, Zveçan, Zubin Potok dhe Leposaviqit vetëm 8 shkolla kanë pranuar që të kthehen në qendra të votimit.

Arianit Elshani, anëtari nga KQZ-ja, ka thënë se ky vendim vjen nga kontaktimi që kanë bërë me organet e sigurisë dhe bisedat me drejtorët e shkollave.

Ai ka sqaruar se vetëm 8 qendra të votimit do të mund të hapën në lokacione të zakonshme si në të kaluarën.

“Nga korrespodencat me organet e sigurisë dhe nga vlerësimi dhe rekomandimi që kemi marrë më 10 prill dhe me kontaktimin që kemi bërë me drejtorët e shkollave, menaxhereve të votimi, është konstatuar se nga 44 qendra të votimit që zakonisht është zhvilluar procesi zgjedhor në vitin 2021 dhe 2019 e tutje, 8 prej tyre kanë konfirmuar që mund t’i hapin ato”.

Elshani, shtoi se 13 qendra të votimit do të jenë alternative ose procesi i votimeve do të zhvillohet në kontejnerë, të cilat do sigurohen nga institucionet tjera.

“Sidoqoftë duke u bazuar në vlerësimin edhe të KKZ-së edhe të organeve të sigurisë është konstatuar që vetëm 6 qendra të votimit mund të hapen në lokacione të zakonshme dhe 13 qendra të votimit do të jenë qendra alternative apo ndryshe në kontinierë të cilat do të sigurohen nga institucione të tjera”, ka sqaruar Elshani gjatë mbledhjes.

Që i bie që ky numër do të zvogëlohet nga ai që ishte paraparë për hapjen e qendrave.

“Pra, nga 44 qendra të votimit që ka marrë vendim KQZ-ja ky numër do të zvogëlohet”.

Kurse është vendosur që numri i votuesve për një vendvotim të rritet nga 750 në 2 mijë votues.

Nga KQZ-ja është thënë se qendrat e votimit do të bëhen të ditura më vonë përmes faqes zyrtare të tyre.

Albanian Post kishte raportuar nga burime brenda KQZ-së se tashmë është vendosur që do të ketë reduktim të madh të vendvotimeve në raport me zgjedhjet e kaluara.

Vonesat në caktimin e vendvotimeve për zgjedhjet në Mitrovicën Veriore, Zubin Potok, Zveçan dhe Leposaviq, erdhën si pasojë e refuzimit të Listës Serbe për të marrë pjesë në zgjedhje, çka e ka koklavitur shumë gjithë procesin.

Lista Serbe, partia më e madhe mes serbëve të Kosovës, dhe kontrolluesit faktik të Veriut, refuzuan të marrin pjesë pa filluar Kosova me themelimin e Asociacionit të Komunave me Shumicë Serbe.

Tash, me mungesën e tyre, ekziston frikë se mund të dështojë i gjithë procesi, për shkak se qytetarët nuk do të dalin fare në zgjedhje.

Gjithashtu, rrezikohet që grupet e kontrolluara nga Lista Serbe të sulmojnë qendrat e votimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.