![](https://albanianpost.com/wp-content/uploads/2024/07/WhatsApp-Image-2024-07-20-at-13.26.51.jpeg)
Mëngjesi i këtij 20 korriku agon me një lajm tronditës të një vetëgjyqësie fundore: vetëvrasjes.
Një nga të përfolurit si të përfshirë në skandalin me mikrokreditë – Olsi Ibro – i cili nuk ka ende asnjë masë nga ana e gjykatës, u vetëhodh nga një pallat në Tiranë.
Teksa ende priten detaje të reja nga ngjarja, thuhet se ai është hedhur nga tarraca e pallatit dhe trupi i tij i pajetë është gjetur nga roja.
Kurse një pistë e re hetimi thuhet se është ngritur nga policia, ku dyshohet se më parë ka pirë helm dhe për shkak të gjendjes së rënduar shëndetësore, është ngjitur në pallatin në ndërtim për t’i dhënë fund jetës.
Nga kamerat e sigurisë, thuhet se 45-vjeçari është parë i vetëm brenda në makinën e tij të parkuar para pallatit. Ai thuhet se ka qëndruar për një kohë të gjatë i vetëm aty, nga ku dyshohet se ka konsumuar edhe helmin.
Mirëpo, pritet të bëhet ekspertiza mjekoligjore për të mësuar të vërtetën e këtij akti ekstrem.
Por kush është Olsi Ibro?
Ai është bashkëshorti i Elda Ibros, administratorja e një prej kompanive financiare të përfshira në skemën e abuzimit të qytetarëve, “Micro Credit Albania”.
Por de facto, pronari ishte 45-vjeçari. Ndaj dhe masa e sigurisë u dha në muajin maj të këtij viti për bashkëshorten e tij, me “arrest shtëpie”, bashkë me katër të akuzuar dhe me pesë të tjerë të lënë në burg.
Ndërkohë, Olsi Ibro ka qenë drejtues i studios ligjore ADCA, e cila ka qenë gjithashtu pjesë e skemës së mashtrimit, dhe dorëzimit të pronave të qytetarëve kredimarrës në dorë të përmbaruesve privatë.
Akti i tij, së pari, vjen një ditë pas sekuestrimit nga Prokuroria Tiranë të kuotave dhe aseteve/aktiveve të “Micro Credit Albania” dhe “Final”.
Dy shoqëritë tregtare – referuar prokurorisë – ngritën skemën e mashtrimit për të zhvatur qytetarët. Dhe se “MCA”, “Final” dhe “ADCA” kanë përndjekur e u kanë ushtruar presion kredimarrësve.
Akti i tij, së dyti, vjen pas një vetëflijimi, por kësaj here nga ana e një qytetari, ndryshe palës së dëmtuar.
Ishte Pal Trashaj, i cili më 2 korrik u bë një nga viktimat pas skandalit për mikrokreditë.
Ai i dha fund jetë duke pirë fostoksinë para ambienteve të Prokurorisë së Posaçme SPAK, pasi pretendonte se përmbarimi i kishte bllokuar pronat, paçka se e kishte shlyer kredinë që kishte marrë.
Jo më larg se dy ditë më parë, ka qenë Guvernatori i Bankës së Shqipërisë, i cili ka shpjeguar në Kuvend rolin e Bankës së Shqipërisë për skandalin e mikrokredive.
Ai theksoi se situata me kreditë e këqija ishte rrezik kombëtar. “Kreditë e këqija kanë qenë problem, ishin alarmante”.
“FMN ka kërkuar që të pastrohen bilancet e bankave nga këto kredi. Në 11 banka kemi 1.9 milionë depozitues me 16 miliardë euro depozita në atë kohë më 10 miliardë euro depozita. Ishte çështje e sigurisë kombëtare. Për këtë arsye u bë me rekomandime të FMN-së dhe ka pasur përfaqësi. U bë një marrëveshje e detajuar, plan masash ku një nga pikat ishte lehtësimi i kushteve për kompanitë që do të merren me ndjekjen e borxhit”.
Por edhe për sa do të jenë akoma një problem?
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com