Vendimi i Qeverisë për të hyrat vetanake rrezikon t’i “falimentojë” komunat dhe ta bllokojë parlamentin

Të hyrat vetanake komunale të cilat janë mjete financiare që mblidhen nga taksat, tarifat, gjobat, pagesat për shërbimet publike të cilat pastaj dedikohen kryesisht vetëm për komunat dhe investimet në to, këtë vit po tentohen që të merren nga Qeveria e Kosovës, por kryetarët e komunave zotohen se nuk do të lejojnë, meqë kjo është në kundërshtim me Ligjin e Financave të Pushtetit Lokal dhe Ligjin e Financave Publike.

Nëse qeveria insiston në vendimin që ka marrë, ata thonë se këtë problem do ta bëjnë çështje të Gjykatën Kushtetuese.

Kryetari i Skenderajt, Fadil Nura, në një bisedë për Albanian Post, thotë se po vazhdoi qeveria me të vetën, rrezikohen disa nga projektet kapitale, të cilat kanë nisur e mund të mbetën në gjysmë.

“Të hyrat vetanake destinohen për projekte kapitale dhe dëmet do të shkojnë direkt tek qytetarët, po ashtu edhe tek projektet të cilat janë duke u zhvilluar. Një pjesë që janë akoma duke u realizuar e një pjesë tjetër që kanë qenë të planifikuar që të vazhdohen përmes të hyrave vetanake”, tha Nura për Albanian Post.

Nura shtoi se qeveria do të duhej ta dinte se “komunat kanë marrëdhënie kontraktuale me operatorët ekonomike”, prandaj po iu ndalën parat që vetë i nxjerrin, “do të jetë një problem jashtëzakonisht i madh për komunat”.

Nura tregoi se janë duke pritur edhe një takim me Qeverinë, e nëse nuk merren vesh, atëherë “me ndërhyrjen e Qeverisë në kompetencat e komunave duhet të merret Kushtetuesja”.

“Ne e kemi diskutuar edhe në kuadër të Asociacionit të Komunave të Kosovës. Tash e kemi edhe një diskutim, e pastaj do ta dërgojmë në Kushtetuese, sepse jemi të bindur që Kushtetuesja nuk e lejon një veprim të tillë”.

Si Nura, edhe kryetari i Ferizajt, Agim Aliu i kontaktuar nga Albanian Post, thotë se me ndalimin e të hyrave vetanake të komunave pritet që investimet kapital në komuna të bllokohen, por jo vetëm.

“Do të ketë deri në 40 për qind investime më pak, shërbime minimale”, pohoi Aliu, duke shtuar se “jam duke folur për dhjetëra milionë euro të cilat do t’u merren komunave”.

“Në vazhdimësi komunat po kanë një lloj ndëshkueshmërie të vazhdueshme”, sipas Aliut. “Më herët ishte bërë marrja e hyrave vetanake, tash edhe me ligjin e ri të tatimit në pronë është e njëjtë tendencë”.

“Pastaj edhe tek ndarja buxhetore kishte pasur një përzgjedhje të komunave ku disa kanë fituar më pak, e disa më shumë, me këto dy veprime të fundit komunat janë atakuar akoma më shumë me humbje të dhjetëra miliona eurove”.

Hallin e komunave me lekët që s’po ua lëshon qeveria, më mirë se kushdo tjetër e di kryetari i Asociacionit të Komunave të Kosovës, Sazan Ibrahimi.

“Jemi në pritje nga parlamenti që të na ftojnë në konsulta”, tha Ibrahimi për Albanian Post.

Ai shpreson se “gjatë diskutimeve të gjejmë modalitetin më të mirë që u përshtatet komunave”.

Komunat takim kishin kërkuar edhe me krerët e Qeverisë, por që ishin refuzuar.

“Pritshmëritë tona janë që parlamenti të mos e bëjë të njëjtin veprim”, shprehet Ibrahimi.

Përplasja e qeverisë dhe opozitës për të hyrat vetanake

Pushteti dhe opozita vazhdimisht janë përplasur për marrjen e të hyrave vetanake nga komunat.

Ministri i Financave Punës dhe Transfereve, Hekuran Murati kishte sqaruar mënyrën se si funksionon ky ligj, kështu duke hedhur fajin tek opozita.

“Kjo çështje rregullohet me ligjin për menaxhimin e financave publike dhe përgjegjësi, ku thuhet se të hyrat vetanake të pashpenzuara të komunës, bartën në vitin vijues”.

“Kjo gjë pastaj rregullohet edhe me nenin 9, paragrafi 6 të ligjit të buxhetit i cili e thotë të njëjtën gjë që të hyrat vetanake nga viti 2022 barten në vitin 2023 dhe kjo është në tërësi në përputhje me ligjin për menaxhimin e financave publike”, ka thënë Murati.

Ai tutje kishte deklaruar se ky ligj është miratuar edhe nga ana e deputetëve të Kosovës.

“Nëse ju kujtohet ka qenë pikërisht ky nen i cili është amandatuar nga grupi parlamentar i Lidhjes Demokratike të Kosovës dhe është votuar edhe nga grupi parlamentar i Lëvizjes Vetëvendosje, do të thotë ka qenë një konsensus sa i përket atij amendamenti”.

“Pra, ne po zbatojmë ligjin të cilin e keni miratuar ju si Kuvend e pastaj nenin përkatës të cilin e ka amandatuar Lidhja Demokratike e Kosovës”.

Ndërsa nga deputetët e Lidhjes Demokratike të Kosovës (LDK) dhe atyre të Aleancës për Ardhmërinë e Kosovës (AAK), kanë deklaruar se do të bojkotojnë seancat e Kuvendit të Kosovës dhe nuk do të nënshkruajnë asnjë marrëveshje ndërkombëtare deri në lëshimin e të hyrave vetanake për komunat.

Murati: Opozita po bën propagandë

Në anën tjetër, në njoftimin se Qeveria e Kosovës ka ndarë 742 milionë euro për komunat për vitin 2024, ministri Hekuran Murati, gjithë situatën me ndaljen e të hyrave vetanake e ka trajtuar si një propagandë të opozitës dhe jo problem real.

“Sot në Komisionin për Grante, nën kryesimin e Kryeministrit Kurti, miratuam ndarjen e granteve komunale që rezulton me një buxhet komunal prej 742 milionë euro për vitin 2024.

Kur kemi marrë qeverisjen në vitin 2021, buxheti i ndarë për komunat ishte 546 milionë euro.

Pra, kemi gati 200 milionë euro më shumë buxhet për komunat me Qeverinë Kurti”, deklaroi Murati.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.