Shqipëria

Vendimet e Qeverisë, nga rindërtimi te parandalimi i armëve pa leje për civilët


Këshilli i Ministrave në Shqipëri, në mbledhjen e radhës, më 9 dhjetor, ka miratuar disa vendime të rëndësishme.

Ministri i Shtetit për Rindërtimin njëkohësisht edhe zëvëndëskryeministri, Arben Ahmetaj, bëri me dije se fondit për “Programin e Rindërtimit” i është shtuar 7 miliardë lekë – nga 28 miliardë në 35 miliardë lekë.

E gjitha kjo ka ardhur për përshpejtimin e procesit të rindërtimit, në mënyrë që familjet – banesat e të cilave u dëmtuan nga tërmeti i fuqishëm i 26 nëntorit 2019 – të futen në shtëpi brenda këtij viti.

Ministri i Shtetit për Rindërtimin, Arben Ahmetaj.

Një vendim tjetër ishte ai për nisjen e punimeve në bazën ajrore të Kuçovës.

Këtë e bëri të ditur ministri i Mbrojtjes, Niko Peleshi, i cili e cilësoi si projektin më madhor në fushën e zhvillimit infrastrukturor.

Ministri i Mbrojtjes, Niko Peleshi.

Nga ana tjetër, me aktet e miratuara në këtë mbledhje, ministrja e Infrastrukturës dhe Energjisë, Belinda Balluku, rikonfirmoi dhe njëherë se familjet dhe bizneset e vogla nuk do të preken nga rritja e çmimit të energjisë për shkak të krizës.

Ajo theksoi se Korporata Elektroenergjitike Shqiptare duhet të prodhojë dhe të furnizojë me energji elektrike, aq sa është mesatarja vjetore prej 4.6 terevat.

Ministrja e Infrastrukturës dhe Energjisë, Belinda Balluku.

Ndërsa ministrja e Arsimit dhe Sportit, Evis Kushi, ka bërë me dije se është miratuar marrëveshja mes Bashkimit Evropian dhe Qeverisë për pjesëmarrjen e Shqipërisë në programin në kuadër të kërkimit shkencor dhe inovacionit.

Sipas saj, unioni me këtë program synon të zhvillojë një treg të vetëm.

Ministrja e Arsimit dhe Sportit, Evis Kushi.

I fundit vendim që u bë me dije, por jo më pak i rëndësishmi kishte të bënte me miratimin e “Plan-Veprimit për vitin 2022-2024 për kontrollin dhe parandalimin e posedimit të armëve pa leje nga civilët”.

Kjo u bë e ditur nga ministri i Brendshëm, Bledi Çuçi, i cili theksoi se do të bëhen disa ndryshime edhe në Kodin Penal.

Sipas tij, ky plan veprimi parashikon të ndalojë posedimin e armëve pa leje te civilët dhe disiplinimin më të fortë të licencimit të përdorimit të armëve luftarake dhe jo vetëm, por edhe ato të gjahut.

Ministri i Brendshëm, Bledi Çuçi.

Ai theksoi se janë parashikuar masa konkrete për sa i takon trafikimit apo prodhimit e armëve.

Çuçi më tej bëri me dije se, “kemi kriminalizuar disa figura të reja të krimit që kanë të bëjnë me trafikimin, siç është ajo përmes kutive postare, përdorimin apo posedimin që mundësojnë printimin 3D të armëve”.

Ministri e mbylli fjalën e tij, duke ritheksuar se ky plan synon parandalimin e posedimit të këtyre armëve të paligjshme.

/Albanianpost.com


Lajmet kryesore