Vdekja e dyfishtë në Pejë që tronditi Kosovën, aktivizohet Prokuroria

Një prokurore e krimeve të rënda nga Prokuroria e Pejës ka dalë në vend të ngjarjes ku kanë humbur jetën nënë e bir të shtunën dhe janë lënduar dy persona si pasojë e reshjeve të mëdha të shiut.

“Prokurorja e krimeve të rënda bashkë me hetuesit policorë edhe sot ka dal në vend të ngjarjes për të parë nga afër edhe njëherë vendin e ngjarjes. Për fat të keq, një fëmijë dhe një grua kanë humbur jetën nga përmbytjet”, tha për Albanian Post zëdhënësi i kësaj prokurorie Shkodran Nikçi.

Në anën tjetër, Milaim Ademaj, familjar i viktimave, ka thënë se nga vërshimet një pjesë e kodrës ka rrëshqitur duke e zënë kështu djalin pesëvjeçar.

Ai ka treguar se nënën e pesë vjeçarit pas shumë kërkimeve e kanë gjetur në një bodrum në një shtëpi, derisa ka theksuar se në rrezik kanë qenë edhe dy fëmijë të tjerë.

“Shi ka rënë, ka rrëshqit një pjesë e kodrës, e ka nxënë djalin, u mbush te ky vëllai plot ujë, derisa e ka mbajtur muri, kur se ka mbajt u fut uji, mezi i kemi shpëtuar dy fëmijë të tjerë, jemi munduar që ta shpëtojmë nusen se atë voglin nuk e kemi pa askund hiç, pastaj e kemi gjetur në një shtëpi të komshinjve, nusen e kemi gjetur në të tretën shtëpi në bodrum”, ka treguar Ademaj për Kosovapress.

Ndërkaq kryetari i Komunës së Pejës, Gazmend Muhaxheri, deklaroi se është tragjike rasti që ndodhi mbrëmë gjatë vërshimeve, derisa shtoi se tanimë gjendja është e qetë.

“Përveç këtij rasti tragjik që kanë humbur nëna me fëmijë, këto tjerat janë gjëra që rregullohen, por këto dy jetë nuk mund të kthehen. Ka ra shi shumë kohë të gjatë mbrëmë dhe ka qenë sasi e reshjeve që nuk ka ndodhur ndoshta për 50 vjet. Duhet t’i bëjmë sajimet dhe të shohim çfarë do të bëjmë”, tha ai.

Reagimet e krerëve të shtetit

Kryeministri i Kosovës, Albin Kurti, ka thënë se me pikëllim të thellë e ka marr lajmin për humbjen tragjike të jetëve të dy qytetarëve, Dion Ademaj dhe Mirsada Ademaj, nga vërshimet e së shtunës në Pejë.

“Kjo humbje e madhe për familjet Ademaj dhe Hoxhiq është humbje e madhe për vendin tonë. Në këto ditë të rënda, dhembjen e ndajmë bashkë me familjarët dhe miqtë e tyre”, shkroi Kurti në Facebook.

“Në emër të Qeverisë së Republikës së Kosovës dhe në emrin tim personal, ju shpreh ngushëllimet më të sinqerta”.

Edhe kryetari i Kuvendit të Kosovës, Glauk Konjufca, ka shprehur ngushëllimet e tij për familjarët e dy viktimave të vërshimeve në Pejë.

“Kjo fatkeqësi na prek secilin dhe ka tronditur të gjithë qytetarët e Kosovës.Në këto momente qëndrojmë pranë familjarëve të viktimave, siç jemi pranë të gjithë qytetarëve të Pejës, të cilët kanë pësuar nga këto vërshime”, ka shkruar ai në Facebook.

Kreu i Kuvendit ka pohuar se njësitet përkatëse të emergjencave me profesionalizmin e tyre janë duke ofruar ndihmën dhe punën e tyre deri në stabilizim të plotë të situatës.

Ndërsa presidentja e Kosovës, Vjosa Osmani, ka thënë se vdekja e dy qytetarëve si pasojë e vërshimeve në Pejë ka tronditur gjithë Kosovën.

“I shpreh ngushëllimet më të thella familjarëve, miqve, kryetarit të Komunës, Gazmend Muhaxheri dhe gjithë qytetarëve të komunës së Pejës për këtë humbje të madhe e kaq tragjike”, shkroi ajo në Facebook.

Ajo ka treguar se Forca e Sigurisë së Kosovës dhe gjithë institucionet e tjera që merren me emergjenca të tilla janë në Pejë që nga mbrëmë duke ofruar ndihmën dhe përkrahjen e tyre.

Parashikimi i motit për të dielën

Instituti Hidrometeorologjik i Kosovës, parashikon që sot mbi vendin tonë të mbajë mot me diell dhe me shi, derisa temperaturat do të bien për 3 deri 8 gradë celsius.

“Pas këtyre temperaturave të larta që u regjistruan ditëve të fundit mbi vendin tonë, situata meteorologjike po ndryshon , duke bërë që merkuri në termometër të ulët mesatarishtë për 3-8 gradë Celsius. Kjo pasi që vikendi parashihet të shoqërohet fillimisht me diell por gjatë ditës, kryesisht pjesët e dyta të ditës do të ketë kushte që vende-vende të ketë reshje dhe shkarkime rrufesh, (nuk do të jenë sasi të mëdha të reshjeve)”, ka njoftuar IHMK-ja.

Ndërkaq temperaturat minimale do të lëvizin ndërmje14-18 gradë celsius, ndërsa maksimalet e ditës do të shoqërohen ndërmjet 22-30 gradë celsius.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.