![](https://albanianpost.com/wp-content/uploads/2024/01/rruga-a.jpg)
Gjykata Supreme ka hedhur poshtë kërkesën e kompanisë ndërtimore “Pro&Co Group”, për rishqyrtim të jashtëzakonshëm të vendimit të Gjykatës Komerciale.
Përmes këtij aktgjykimi të Supremes lejohet vazhdimi i punimeve në rrugën “A”.
“Refuzohet si e pa bazuar kërkesa për rishqyrtim të jashtëzakonshëm të vendimit gjyqësor, e parashtruar nga paditësi, “Pro&CO Group” Sh.p.k, me seli në Graçanicë, kundër aktvendimit të Gjykatës Komerciale në Prishtinë – Dhomat e Shkallës së Dytë, Kom.Dh.Sh.II, nr.1725/23 të datës 29.12.2023”, thuhet në aktgjykimin e Supremes.
Nga Supremja, është thënë se janë shqyrtuar edhe pretendimet e tjera të parashtruesit të kërkesës, por që të njëjtat kanë rezultuar të jenë “të pabazuara, të paqëndrueshme dhe të pa argumentuara”.
“Si të tilla edhe nga Gjykata Supreme refuzohen të pa bazuara dhe jo me ndikim për të vendosur ndryshe në këtë çështje nga ajo e vendosur dhoma e shkallës së dytë, si në aktvendimin e saj, i cili rezulton se është i drejtë, ligjor dhe i arsyetuar mjaftueshëm, bazuar në faktet vendimtare sipas provave dhe fakteve të paraqitura nga palët”.
“Ashtu si parashihet në nenin 22 të LKA’së, për aq sa është e domosdoshme të arsyetohet mënyra e vendosjes për masë të përkohshme, pa u prejudikuar mënyra e vendosjes së çështjes kryesore”.
Më 21 nëntor, kryetari i Prishtinës, Përparim Rama, kishte njoftuar se pas ndërprerjes së punimeve në “rrugën A”, ato kishin rinisur sërish më 21 nëntor.
Duke bërë të ditur se ky vendim ishte aprovuar edhe nga shkalla e dytë e Gjykatës Komerciale.
I pari i Prishtinës, vendimin e Gjykatës Komerciale për t’i ndalë punimet në “Rrugën A”, e kishte konsideruar si një vendim që është i bazuar në interesa politike e grupe interesi, pasi që gjyqtarja që e kishte marrë këtë vendim është motra e deputetes së Lëvizjes Vetëvendosje, Fitore Pacolli.
Ai kishte kërkuar nga Këshilli Gjyqësor që të sigurojë që ky proces të jetë i drejtë, profesional, i paanshëm, dhe i bazuar vetëm në ligj.
Reagime të shumta për ndalimin e kësaj rruge kishte pasur edhe nga partitë opozitare nga ta sjellja në një rast të tillë tregon për një veprim të kontaminuar.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com