Vazhdon operacioni “Brezovica” – bastisje edhe në Ministrinë e Mjedisit

Me gjashtë janar, policia e Kosovës ka vazhduar operacionin “Brezovica”, i cili lidhet me ndërtimet në Brezovicë.

Në kuadër të këtij aksioni është duke u bastisur edhe Ministrja e Mjedisit dhe Planifikimit Hapësinor në Prishtinë.

Lajmin për Albanian Post e konfirmoi kryeprokurori i Ferizajt, Shukri Jashari.

“Po është duke vazhduar aksioni, bastisje ka në 10 lokacione gjithsej. Bastisjet po bëhen në Ferizaj, Prishtinë e Shtërpcë”, tha Jashari për Albanian Post.

Lajmin e ka konfirmuar edhe Policia e Kosovës për Albanian Post.

Zëdhënësi i Policisë, Baki Kelani ka thënë se ky hetim është vazhdimësi e rastit “Brezovica”.

“Informacion zyrtar Prishtinë 06 janar 2022, Mund të konfirmojmë se Policia e Kosovës, në këtë rast Drejtoria për Hetimin e Krimeve të Rënda, në bashkëpunim dhe koordinim me Prokurorinë kompetente, është duke e realizuar një operacion, i cili është vazhdimësi e hetimit të rastit ‘Brezovica’.

Ndërsa shtoi se, “ky operacion shtrihet në dy rajone, atë të Ferizajt dhe Prishtinës, ku përfshihen disa lokacione. Informacione shtesë do të jepen pas përfundimit të operacionit”, deklaroi Kelani për AP.

Më 21 dhjetor, Policia e Kosovës zhvilloi një aksion në Shtërpcë lidhur me ndërtimet.

Më pas, Gjykata Themelore në Ferizaj e ka caktuar masën e paraburgimit prej një muaji për dhjetë personat e arrestuar më 21 dhjetor në rastin ‘Brezovica’.

Në mesin e tyre është edhe Bratisllav Nikolliç, ish – kryetar i Komunës së Shtërpcës dhe zyrtar i Listës Serbe.

Arrestimi i tyre është bërë nën dyshimin për vepra penale si keqpërdorim i detyrës zyrtare, marrjes dhe dhënies së ryshfetit, gjegjësisht për dhënien e leje për ndërtimet në Brezovicë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.