Varhelyi: Kosova të ofrojë një qasje më konstruktive në mënyrë që sanksionet të tërhiqen

Komisioneri i Bashkimit Evropian (BE) për Fqinjësinë dhe Zgjerimin, Oliver Varhelyi, deklaroi të hënën se Qeveria e Kosovës duhet të ofrojë një qasje më konstruktive në mënyrë që masat ndëshkuese të vendosura në qershor të vitit të kaluar të tërhiqen, ndërsa shtoi se kjo është mënyra e vetme që BE-ja të vazhdojë mbështetjen për rrugën evropiane të Kosovës.

“Kosova ka qenë në gjendje të vazhdueshme krize gjatë vitit të fundit. Hapi i parë duhet të jetë përmbushja e plotë e kërkesave tona në mënyrë që masat të tërhiqen dhe mbështetja jonë ekonomike dhe politike për rrugën e Kosovës drejt BE-së të ecë përpara me shpejtësi të plotë”, theksoi komisioneri evropian në forumin “BE-ja takon Ballkanin” në Sofje të Bullgarisë.

Zyrtarët e BE-së vazhdimisht nënvizojnë se masat ndëshkuese ndaj Kosovës që u implementuan në bazë të deklaratës së 27 vendeve anëtare (3 qershor 2023), mund të tërhiqen vetëm atëherë kur Kosova të bëjë hapa konkretë në drejtim të deeskalimit të situatës në veri, përfshirë hapjen e procedurave për themelimin e Asociacionit të Komunave me Shumicë Serbe.

Varhelyi foli edhe për instrumentin e BE-së për rritje ekonomike për gjashtë vendet e Ballkanit Perëndimor, derisa shtoi se Plani i Rritjes synon të promovojë zbatimin e të gjitha marrëveshjeve të arritura ndërmjet Kosovës dhe Serbisë në kuadër të dialogut për normalizimin e marrëdhënieve.

“Unë, natyrisht, dua të shtoj se ne kemi një element të ri për të promovuar një dialog të suksesshëm. Dhe ky është Plani i Rritjes, nëpërmjet së cilit, ne duam të promovojmë zbatimin e të gjitha marrëveshjeve eksituese të arritura në dialog”, potencoi ndër të tjera komisioneri hungarez.

Një parakusht shtesë për Kosovën dhe Serbinë, përveç përmbushjes së kritereve që kanë të bëjnë me sundimin e ligjit dhe reformat institucionale, do të jetë edhe anagazhimi në mënyrë konstruktive për të normalizuar raportet mes tyre me qëllim të zbatimit të plotë të të gjitha obligimeve që burojnë nga procesi i dialogut nën ndërmjetësimin e bllokut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.