Varfëria ekstreme mund të çrrënjoset globalisht deri në vitin 2050

Fundi i varfërisë ekstreme mund të arrihet më në fund deri në vitin 2050, nxitur nga rritja ekonomike në vendet me të ardhura të ulëta.

Kështu mendohet referuar një parashikimi të ri ekonomik nga Qendra për Zhvillim Global (CGD).

Sipas raportit, paçka se pandemia filloi të ndryshojë progresin në zhdukjen e varfërisë ekstreme, dëmi mund të ketë një ndikim shumë të kufizuar në trajektoren e përgjithshme të rritjes ekonomike.

“E dimë se bota do të duket shumë ndryshe në vitin 2050 dhe ndryshimi i klimës është një shqetësim i madh për të ardhmen”, ka thënë Charles Kenny, një bashkëpunëtor i lartë në CGD dhe një nga autorët e raportit.

“Por nuk mund ta lëmë të errësojë faktin se rritja e vazhdueshme ekonomike nuk duhet të lërë thuajse askënd në varfërinë më të dëshpëruar që ishte pjesa e shumicës dërrmuese të njerëzimit për pjesën më të madhe të historisë, dekada pasi ajo mund të ishte çrrënjosur”, ka vijuar ai.

Kenny ka theksuar se pabarazia ka të ngjarë të mbetet dhe varfëria do të ekzistojë ende, por rritja më e lartë duhet të nënkuptojë që shumica e njerëzve të kenë punësim dhe të ardhura të qëndrueshme, në vend që të mbështeten në punën e pasigurt informale.

Po ashtu ai ka shtuar se deri në vitin 2050, asnjë vend nuk do të klasifikohet si me të ardhura të ulëta.

Kenny, autori i librit “Getting Better: Why Global Development is Succeeding”, ka thënë se ai dhe Zack Gehan, i cili punoi me të, morën të dhëna historike mbi të ardhurat, ndryshimet demografike, arsimin dhe temperaturën për të parashikuar formën e ardhshme të ekonomisë së botës.

Sipas parashikimit, varfëria ekstreme – që jeton me më pak se 2.15 dollarë në ditë – do të bjerë nën 2 për qind globalisht deri në vitin 2050 nga rreth 8 për qind në vitin 2022.

Në Afrikë, ku është më e larta, do të bjerë nga 29 për qind në 7 për qind.

Më shumë se dy të tretat e botës mund të jetojnë me më shumë se 10 dollarë në ditë deri në vitin 2050, nga rreth 42 për qind sot.

Autorët gjithashtu kanë parashikuar rritje shumë më të ngadaltë në vendet me të ardhura të larta gjatë dy dekadave të ardhshme, me PBB për frymë që do të rritet vetëm rreth 20 për qind nga viti 2019, ndërsa dyfishohet në vendet me të ardhura të ulëta dhe të mesme.

Rathin Roy, drejtor menaxhues i thinktank-it për çështjet globale ODI, ka thënë se parashikimet e Kenny-t ishin të mundshme “nëse të gjithë bëjnë gjënë e duhur”.

Roy ka theksuar se ishte e rëndësishme që vendet të kujdeseshin për më pak fatin e tyre. Fakti që varfëria vazhdon ende në vende të tilla si Britania e Madhe dhe SHBA-të tregon më shumë sesa thjesht rritje ekonomike.

“Nuk mjafton vetëm arritja e niveleve të larta të të ardhurave. Nëse do të ishte, fëmijët nuk do të shkonin të uritur në shkollë. Njerëzit nuk do të vuanin për shkak të mungesës së kujdesit mjekësor dhe humbjes së vendeve të punës”, ka thënë ai.

Sakaq, Kenny ka thënë se parashikimi i së ardhmes së ekonomive të botës ishte i dobishëm sepse ndihmon të mendosh se si mund të duken në të ardhmen çështje të tilla si varfëria apo shpenzimet ushtarake dhe për të përshtatur diskutimet e politikave rreth kësaj.

Ai ka shprehur shqetësimin se parashikimet e tij tregojnë pak rritje në vendet e pasura – plakja e popullsisë mund të çojë në adoptimin e politikave izoluese dhe autoritare në përgjigje të recesioneve – por në përgjithësi është optimist.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.