Vape njëpërdorimësh do të ndalohen në MB për të frenuar përdorimin te të rinjtë

Ministrat britanikë do të ndalojnë vape-ët njëpërdorimësh si pjesë e një përpjekjeje në mbarë Mbretërinë e Bashkuar për të frenuar pirjen e tyre nga të rinjtë.

Qeveria po kërkon gjithashtu ta bëjë këtë version më pak tërheqës për fëmijët duke kufizuar shijet e ëmbla, duke futur paketim të thjeshtë dhe duke i bërë ekspozitat më pak të dukshme në dyqane.

Sakaq, ndryshimet pritet të hyjnë në fuqi në fund të këtij viti ose në fillim të vitit 2025.

Kryeministri Rishi Sunak ka thënë se “një nga tendencat më shqetësuese për momentin është rritja e përdorimit të vape-ve te fëmijët, ndaj duhet të veprojmë përpara se të bëhet endemike”.

“Si kryeministër, kam detyrimin të bëj atë që mendoj se është gjëja e duhur për vendin tonë në planin afatgjatë. Kjo është arsyeja pse po ndërmarr veprime të guximshme për të ndaluar vape-ët njëpërdorimësh”.

Masa është pjesë e një reagimi më të gjerë ndaj një konsultimi publik për pirjen e duhanit dhe vape-ve, i cili ka rezultuar në plane për disa nga masat më të ashpra kundër duhanit në botë, duke përfshirë një ndalim për shitjen e produkteve të duhanit për këdo që ka lindur në ose pas 1 janarit 2009.

Megjithëse përdorimi i vape-ve mund të jetë një mjet i dobishëm për të ndihmuar duhanpirësit e rritur që të lënë duhanin, mjekët janë të shqetësuar për ndikimin afatgjatë të panjohur shëndetësor te të rinjtë dhe sistemet e tyre të frymëmarrjes në zhvillim, si dhe varësia ndaj nikotinës, e cila mund të shkaktojë ankth, probleme në përqendrim dhe dhimbje koke gjatë tërheqjes.

Shifrat e fundit tregojnë se numri i fëmijëve që përdorin vape në tre vitet e fundit është trefishuar, me 9% të moshave 11 deri në 15 vjeç.

Kurse përqindja e moshës 11 deri në 17 vjeç që përdorin pajisje të disponueshme është rritur pothuajse nëntëfish në dy vitet e fundit.

Ndalimi do të zvogëlojë gjithashtu ndikimin e madh mjedisor të produkteve të disponueshme, pasi 5 milion vape hidhen çdo javë, nga 1.3 milionë vitin e kaluar.

Planet e Sunak për të ndaluar shitjen e produkteve të duhanit për këdo që ka lindur pas 1 janarit 2009 duket se do të përballet me kundërshtime.

Rebelët përfshijnë ish-kryeministren Liz Truss, e cila ka thënë se masa ishte një “politikë tërësisht jo-konservatore”.

Qeveria shpreson të prezantojë legjislacionin që do të ndalojë vape-ët e disponueshëm sa më shpejt të jetë e mundur duke përdorur ligjet ekzistuese për mbrojtjen e mjedisit.

Ndalimi do të zbatohet gjithashtu në Skoci, Uells dhe Irlandën e Veriut përmes legjislacionit të transferuar.

Ministrat do të duhet të miratojnë projektligjin e duhanit dhe vape-ve, të përfshirë në fjalimin e mbretit, për të marrë kompetencat për të kufizuar shijet, për të futur paketimin e thjeshtë dhe për të ndryshuar mënyrën se si shfaqen në dyqane.

Shpejtësia e kalimit të tij varet nga legjislacioni tjetër i pazgjidhur dhe do të pasohet nga një periudhë zbatimi gjashtëmujore për t’u dhënë kohë shitësve për t’u përshtatur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.