Valixhet me trupa të copëtuar në Firenze, hije e “mafies” shqiptare?

Drama e familjes Pasho rikthehet pas pesë vitesh

Tre valixhe janë gjetur pranë burgut të Solliciano-s, në Firenze, nga policia italiane. Brenda tyre, të copëtuar në mënyrë makabre, një çift shqiptarësh, Shpëtim dhe Teuta Pasho!

Valixhja që përmbante trupin e burrit, u zbulua në 11 dhjetor në një fushë pranë burgut. Tre ditë më vonë, një valixhe tjetër u gjet, me trupin e gruas, ku sipas autopsisë rezultoi të ishte dhunuar brutalisht.

Çifti shqiptar nuk është i panjohur për mediat në Itali, pasi në 2016-ën, vajza e tyre, Dorina, doli në emisionin “Chi l’ha visto?” për t’i kërkuar pas zhdukjes së tyre në dy nëntori të vitit 2015.

Kjo datë, përkon edhe me lirimin e djalit të tyre nga burgu, Taulantit, i cili ishte dënuar për kapjen me gjashtë kile e gjysmë marijuanë. Prej 2016-ës, ai është në arrati nga policia.

A fsheh kjo ngjarje e cila ka shtangur Firenze-n dhe gjithë Italinë një krim mafioz shqiptar?

Qytetarët e Firenze-s kanë mbetur të tronditur pas zbulimit të tre valixheve me dy trupa të dhunuar dhe gjymtuar mizorisht në një fushë buzë rrugës Fi-Pi-Li, shumë pranë burgut të Solliciano-s.

Rindërtimi i profileve të viktimave ka qenë i vështirë, pasi kanë qenë të “paketuar” me celofan dhe najlon, të mbështjellë me ngjitës, pas një procesi dezinfektimi të aplikuar mbi ta.

Mbi trupin e burrit shenja dhune dhe një e prerë në fyt.  Në pjesën e parakrahut, një tatuazh i padeshifruar.

Gruaja, e dhunuar brutalisht! Sipas të dhënave të dala nga autopsia, e rrahur me grushte e shkelma, më pas e mbytur deri në vdekje.

Pas daljes së lajmit, një telefonatë ka mbërritur tek “Carabinieri-t”.

Një vajzë shqiptare, Dorina Pasho, ka dyshuar se ata mund të jenë prindërit e saj, të zhdukur në nëntor 2015!

Në shkurt të 2016-ës, Dorina kërkoi prindërit e saj nëpërmjet emisionit “Chi l’ha visto?”, pas ikjes së tyre nga shtëpia për shkak të një diskutimi familjar dhe shkëputjes së çdo kontakti.

“Babai dhe mamaja ime janë zhdukur prej tre muajsh. Më ndihmoni, nuk e di ku ndodhen”, lutej Dorina e përlotur në emisionin italian.

Prindërit e saj jetonin midis Shqipërisë dhe Italisë, dhe për atë kohë, gjithçka u la me aq. Ndoshta, prindërit e saj thjeshtë ishin larguar vullnetarisht.

Por, sot kemi tre valixhe, dhe brenda tyre, janë dy trupa njerëzish.

Dorina kërkon të dijë nëse në ato valixhe gjenden prindërit e saj. “Kam kontaktuar “Carabinieri-t” dhe më shpjeguan se pritet autopsia dhe adn-ja. Do të më njoftojnë nëse janë prindërit e mi”, deklaroi ajo pas kontaktit të parë me forcat e rendit të Firenze-s.

E dhëna kryesore që i jep shkas Dorinës të mendojë se janë prindërit e zhdukur, është se babai i saj, Shpëtimi, ka pasur një tatuazh tek parakrahu. Simbolin e spirancës dhe vitin në të cilin kishte kryer ushtrinë.

Një ditë më vonë, Dorinës i vjen konfrimi: Trupat e pajetë, janë ato të  Shpëtim dhe Teuta Pashos!

Nuk dihet ende asgjë mbi motivet e këtij krimi dhe autorin apo autorët. Gjithçka dihet është se në katër tetor 2015, çifti Pasho udhëtuan drejt Italisë ku qëndruan një muaj.

Në dy nëntor 2015, Dorina merr një telefonatë nga një numër anonim, prej të cilit mamaja e saj i shpjegonte se nuk donte t’i përgjigjej askujt dhe nuk donte asnjë lajm nga askush.

Dy nëntori i 2015-ës, nuk është një datë e rastësishme për familjen Pasho, pasi në atë ditë, djali i familjes, Taulanti, lirohet nga burgu, pasi ishte dënuar për shkak se zotëronte një sasi prej gjashtë kile e gjysmë marijuane.

Prej 2016, Taulanti është sërish në arrati dhe nuk dihet ende lidhja e tij me këtë ngjarje, por, ai mbetet pista e vetme e çastit për zbardhjen e saj.

Pritet të shihet nëse pas këtij krimi të tmerrshëm, fshihet një ngjarje familje, apo diçka më e madhe, ndoshta, edhe një prapaskenë mafioze shqiptare, një mesazh!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.