“Urime Festa e Kurban Bajramit, ju lutemi vaksinohuni”

Në ditën kurë të gjithë përfaqësuesit e institucioneve qendrore dhe lokale në Kosovë po urojnë festën e Kurban Bajramit, të paktë janë ata që në listën e urimeve të tyre përmendin viktimat e Covid-19 dhe të bëjnë thirrje për vaksinim.

Por këto detaje nuk i ikin Ministrit të Shëndetësisë, Arben Vitia.

Në urimin e tij për festën e Kurban Bajramit ai nuk ka lënë pa përmendur edhe vaksinimin e qytetarëve kundër COVID-19.

Me anë të një postimi në mediat sociale ai ka shkruar se “Kurban Bajrami në bazën e saj ka sakrificën, barazinë dhe solidaritetin. Festë që na bashkon më shumë me njëri-tjetrin”.

Vitia tutje është shprehur se përgjatë kësaj dite mblidhemi me familjarë dhe takojmë të afërm.

“Festat si kjo janë shprehje e adhurimit, e gëzimit për përkrahjen e njeri-tjetrit. Tashmë kur po përballemi me pandeminë, është e rëndësishme që të vaksinohemi sa më shpejt dhe të mbrojmë vetën dhe të tjerët. Ndaj në këtë ditë përcillni porosinë të afërmve tuaj, miqve e shokëve se mbrojtja e shëndetit është detyrë për të gjithë. Le të marrim vaksinën që festat e ardhshme t’i festojmë me plot hare”, ka shkruar Vitia.

Po ashtu në këtë ditë feste, Instituti Kombëtar i Shëndetësisë Publike të Kosovës, (IKShPK) ka uruar qytetarët e Kosovës për festën e Kurban Bajramit.

Kështu duke u bërë thirrje të gjithë qytetarët që të vaksinohen.

“Puna në Institutin Kombëtar vazhdon pa pushim! Qytetarë të nderuar! Urime Festa e Kurban Bajramit! Ju lutemi vaksinohuni të gjithë për të qenë të shëndetshëm”, thuhet në postimin e faqes zyrtare të IKSHPK-së”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.