Ministrja franceze Sylvie Retailleau u ka kërkuar rektorëve të universiteteve që të garantojnë “ruajtjen e rendit publik duke përdorur fuqitë maksimale” që kanë në dispozicion për të frenuar protestat në mbështetje të Gazës në kampuset franceze.

Në to, për disa javë ka pasur demonstrata dhe bllokada të njëpasnjëshme të frymëzuara nga demonstratat në universitetet amerikane.

“Unë ju kërkoj të përdorni maksimumin e kompetencave që ju jep Kodi i Arsimit”, ka thënë Retailleau në një fjalim para presidentëve të universiteteve.

“Presidentët janë përgjegjës për ruajtjen e rendit në kampuset universitare. Dhe policia mund të hyjë vetëm me kërkesë të autoriteteve universitare”, ka rikujtuar drejtuesja e 74 universiteteve publike në Francë.

Retailleau po ashtu ka drejtuar thirrje për “garantim të pluralitetit të shprehjes” brenda universiteteve dhe për “forcimin e mekanizmave për të lejuar që të gjitha debatet të zhvillohen në institucione, duke respektuar ligjin, por edhe njerëzit dhe idetë”.

Sakaq, sa i përket kërkesave të studentëve, ministrja ka thënë se “nuk bëhet fjalë që universitetet të marrin një pozicion institucional në favor të ndonjë kërkese të veçantë në konfliktin aktual në Lindjen e Mesme”.

Kryeministri Gabriel Attal ka deklaruar ndërkohë se “nuk do të ketë kurrë të drejtë për të bllokuar universitetet, nuk do të ketë kurrë tolerancë për veprimet e një pakice aktive dhe të rrezikshme që kërkon të vendosë rregullat e saj ndaj studentëve dhe pedagogëve tanë”.