UNHCR ‘pajtohet’ të monitorojë zbatimin e marrëveshjes Itali-Shqipëri për emigrantët

Agjencia për refugjatë e Kombeve të Bashkuara (UNHCR), që ka shprehur shqetësime të thella lidhur me marrëveshjen e Italisë për të shqyrtuar disa kërkesa për azil të emigrantëve në dy qendra në Shqipëri, është pajtuar që të monitorojë tre muajt e parë të zbatimit të marrëveshjes.

UNHCR ka ravijëzuar se nuk është pjesë e marrëveshjes Itali-Shqipëri, duke shtuar se ende ka rezerva lidhur me marrëveshjen.

Agjenci ka thënë po ashtu se ka kërkuar sqarim se si do të zbatohet marrëveshja, shkruan REL.

Por tani UNHCR-ja ka bërë me dije se është pajtuar të monitorojë zbatimin, në mënyrë që të ndihmojë “në respektimin e të drejtave dhe dinjitetit të personave që janë subjekt” i marrëveshjes.

Agjencia ka bërë me dije se do të këshillojë emigrantët për të drejtën e tyre për të kërkuar azil dhe do të sigurohet që procedurat që do të përdoren të jenë “në vijë me standardet ndërkombëtare dhe rajonale për të drejtat e njeriut, të jenë të drejta dhe të ofrojnë mbrojtje dhe zgjidhje për ata që kanë nevojë për mbrojtje ndërkombëtare”.

Vitin e kaluar, Italia dhe Shqipëria arritën paktin pesëvjeçar.

Sipas marrëveshjes, Shqipëria do të strehojë emigrantë që do të shpëtohen në det, teksa Italia me procedurë të përshpejtuar do të shqyrtojë kërkesat e tyre për azil.

Dy qendrat ku do të vendosen emigrantët është dashur të funksionalizohen këtë javë, por për shkak të vonesave në ndërtim, hapja e tyre është shtyrë.

Dy qendrat, që do të financohen dhe menaxhohen nga Italia, mund të akomodojnë deri në 3 mijë emigrantë që do të vijnë nga Italia përmes detit.

Qendra e emigrantëve në Shqipëri – “Gati nga mesi i gushtit”

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.