UKK: Uji i pijshëm mund të jetë kontaminuar nga reshjet e dendura, qytetarët të zbrazin depozitat

Përmes një deklarate zyrtare, Ujësjellës Kanalizime Krujë (UKK) ka njoftuar ndërprerjen e furnizimit me ujë të pijshëm pasi dyshohet se mund të jetë kontaminuar nga reshjet e dendura të shiut.

“Nga të dhënat paraprake të analizave fiziko-kimike të deritanishme, dyshohet se reshjet e dendura të shiut ditën e shtunë pasdite dhe në orët e para të ditës së dielë, në të gjithë territorin e Bashkisë Krujë dhe në veçanti në Malësinë e Krujës ku ndodhen veprat e marrjes së ujësjellësit, të kenë sjellë kontaminimin e ujit të pijshëm”, shkruhet në deklaratën e UKK-së.

Në njoftimin e zbardhur për mediat UKK-ja, bën thirrje ndërkaq që të gjithë qytetarët duhet të zbrazin depozitat e ujit, në mënyrë që të shmanget çdo rast i mëtejshëm kontaminimi.

Të hënën e 25 tetorit, pranë spitalit “Stefan Gjoni”, u paraqitën dhjetëra raste me komplikacione shëndetësore.

Dyshimet e para lidheshin me konsumimin e ujit të pijshëm.

Duke marrë shkas nga kjo situatë, Instituti i Shëndetit Publik, ka marrë mostrat e ujit për të zbuluar shkaqet e helmimit.

UKK-ja nënvizon më tej se mbetet në pritje të përgjigjeve nga institucionet përkatëse.

“Sqarojmë se UKK Krujë po vijon me dezinfektimin e depove të qytetit me anë te proçesit të klorinimit, ndërkohë analizat fiziko–kimike dhe ato mikrobiologjike do të çertifikojnë ri-fillimin e furnizimit me ujë të pijshëm për banorët”, theksohet në njoftim.

UKK-ja sqaron se do të ketë një autorizim për përdorimin e ujit të pijshëm, në një moment të dytë, pas çertifikimit të analizave përfundimtare nga ISHP-ja.

Reagimet

Ministrja e Shëndetësisë në Shqipëri, Ogerta Manastirliu, vizitoi gjatë të martës, pacientët e helmuar në Spitalin e Krujës.

“Situata e qetë nuk ka pacientë të rënduar. Po kryhen hetime për shkakun e helmimit”, u shpreh ministrja.

Më herët, ishte presidenti i Shqipërisë, Ilir Meta, i cili përmes një postimi në median sociale Facebook, reagoi lidhur me helmimin e më shumë se 300 banorëve.

“Me shqetësim po përcjell helmimin në masë të banorëve të Krujës, një situatë alarmante, që duhet trajtuar me shumë përgjegjësi dhe seriozitet nga institucionet shtetërore përgjegjëse për shëndetin publik, por edhe nga drejtësia”.

Meta u ka bërë thirrje autoriteteve përkatëse për zbardhjen e burimit që çoi në këtë gjendje.

“I nxis shërbimet shëndetësore epidemiologjike dhe ato të mjekësisë ligjore të zbardhin sa më parë burim shkakun dhe shkaktarët e përgjegjësit e kësaj ngjarjeje të rëndë, që përbën një kërcënim serioz për jetët njerëzore dhe Sigurinë Kombëtare”.

Në orët e para të 26 tetorit, ka pasur një reagim dhe nga drejtoresha e spitalit, Yllka Sheta, mbi gjendjen alarmante të krijuar në Krujë, pas helmimit, për të cilin dyshohet se ka ardhur nga uji i pijshëm.

Sipas saj, në Spital deri më tani janë paraqitur mbi 300 banorë për të marrë ndihmë mjekësore me simptomat e helmimit.

“Nuk ka pasur raste të rënda, që t’i dërgonim për mjekim të specializuar në Tiranë, kanë marrë të gjithë shërbimin këtu”, siguroi Sheta.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.