Udhëtimi sekret, rusja dhe vjedhja: Kush është ushtari amerikan i arrestuar në Vladivostok?

Gordon Black, një ushtar amerikan i vendosur në Korenë e Jugut, duhej të kthehej te familja e tij në Fort Cavazos, Texas, por shkoi në Vladivostok, Rusi.

Shkoi për të takuar një grua me të cilën kishte pasur një lidhje më parë. Dhe tani ai është në gjyq për vjedhje dhe dhunë në vendin e Vladimir Putinit.

“Nuk është një rast i lidhur me politikën apo spiunazhin”, ka siguruar përfaqësuesi i Ministrisë së Jashtme ruse në Vladivostok.

Por fati i ushtarit, si ai i një shtetasi tjetër amerikan të ndalur ditët e fundit në Moskë, rrezikon të përfundojë në ‘lojërat’ mes Moskës dhe Washingtonit, ku shkëmbimi i të burgosurve është bërë praktikë e zakonshme.

Lajmi për arrestimin e Black në qytetin port të Lindjes së Largët Ruse u raportua nga NBC News pak ditë pas arrestimit.

Dhe zëdhënësja e gjykatës lokale, Elena Oleneva, ka konfirmuar elementet e siguruara nga mediat amerikane.

Në momentin e arrestimit, që ndodhi më 2 maj në një hotel, Black kishte blerë tashmë biletat për t’u kthyer në atdhe.

Më 3 maj, gjykata konfirmoi masat parandaluese dhe ai do të qëndrojë në një qendër paraburgimi në Vladivostok deri më 2 korrik, por ende nuk është caktuar një datë për shqyrtimin e çështjes.

Autoritetet amerikane u njoftuan menjëherë, konfirmoi koordinatori i komunikimeve strategjike të Këshillit të Sigurisë Kombëtare, John Kirby.

Sakaq, zëdhënësja e ushtrisë Cynthia Smith siguroi se Departamenti i Shtetit po i ofronte 34-vjeçarit “mbështetje të përshtatshme konsullore”.

Sipas zërave nga burime anonime nga agjencia AP, shtetasja ruse e përfshirë në këtë rast është takuar me ushtarin amerikan në Korenë e Jugut, ku ka jetuar dhe punuar për një periudhë.

Marrëdhënia ka zgjatur të paktën deri në vjeshtën e vitit të kaluar.

Më pas, për arsye të paqarta, 32-vjeçarja është kthyer në vendlindje.

Ushtari amerikan, pasi mori lejen për t’u kthyer, vendosi t’i bashkohej asaj në Rusi në fillim të prillit, pa informuar njësinë e tij për lëvizjen.

Sipas një shënimi nga Ministria e Brendshme ruse – e cila nuk përmend emrin e Black, por që i atribuohet rastit të ushtarit – të dy kishin pasur një debat të dhunshëm pas të cilit gruaja do të zbulonte se i kishin grabitur 200 mijë rubla.

Kështu, ai rrezikon një dënim për vjedhje.

Autoritetet ruse kanë arrestuar një ushtar amerikan

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.