Udhëtimi pa viza edhe në Spanjë, Kurti: Pasaportës sonë po i rritet vlera, e shtetit dinjiteti

Kryeministri i Kosovës, Albin Kurti, ka mirëpritur vendimin e Spanjës që t’i njohë pasaportat e Kosovës, kjo pas liberalizimit të vizave, duke iu mundësuar kështu qytetarëve të Kosovës lirinë e lëvizjes pa viza edhe në Spanjë – shtet që s’e njeh pavarësinë e Kosovës.

Përmes një postimi në llogarinë e tij në platformën sociale Instagram, Kurti ka thënë se viti 2024 është vit i fuqizimit të pasaportës së Kosovës.

“Asaj sa vjen e po i shtohet vlera, e shtetit tonë dinjiteti. Nga janari, Spanja u është bashkuar shteteve të Bashkimit Evropian që e njohin pasaportën e Kosovës. Gëzuar!”, ka shkruar kreu i ekzekutivit.

 

View this post on Instagram

 

A post shared by Albin Kurti (@albinkurti_)

Ishte zëvendëskryeministri i parë i Kosovës, Besnik Bislimi, i cili përmes një postimi në platformën sociale Facebook, bëri të ditur se kosovarët tashmë mund të udhëtojnë pa viza edhe drejt Spanjës, meqë ky shtet ka marr vendim për njohjen e pasaportave të Kosovës.

Sipas Bislimit, ky lajm është kumtuar nga Departamenti për Migrim dhe Çështje të Brendshme të Bashkimit Evropian.

Kur Kosova fitoi të drejtën e lëvizjes së lirë pa viza në zonën Schengen të BE-së, një gjë e tillë nuk u bë e vlefshme edhe për shtetin e Spanjës, meqë Madridi zyrtar refuzonte ta njihte pasaportën e Kosovës.

Megjithatë, një kusht i tillë nuk vlen më.

“Lajmet e mira vazhdojnë. Për qytetarët tanë dhe shtetin. DG Home ka njoftuar se tashmë edhe Spanja i njeh pasaportat e Republikës së Kosovës. Pra mund të udhëtojmë pa viza dhe drejt këtij shteti”.

“Ndërsa me 1 janar nisi lëvizja pa viza, Spanja është destinacion që i shtohet vendeve të zonës Shengen ku mund të udhëtojmë përmes liberalizimit, e ku pengesë më herët ishte mosnjohja e pasaportës sonë”.

Bislimi thotë se tashmë edhe Spanja e njeh pasaportën e Kosovës

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.