“U zgjuam nga të shtënat e armëve, ishte ditë e zezë”, rrëfimi i banorëve ku ndodhi vrasja e policit serb
![](https://albanianpost.com/wp-content/uploads/2024/07/lociaaa.jpg)
Banorët e që jetojnë në Loznicë të Serbisë, kanë treguar për mediumin serb Nova.rs se janë zgjuar nga gjumi nga të shtënat me armë zjarri pas vrasjes së një polici serb të enjten.
“Isha duke fjetur, më zgjuan të shtënat. Por nuk ishte një apo dy, ishin shumë. Menjëherë dola me vrap në tarracë dhe pash një polic që ishte strehuar pranë garazhit tonë. Ai po thërriste dikë”, ka rrëfyer një qytetar.
“Dola jashtë për ta ndihmuar, por nëna ime më ndaloi, më tha të mos dilja nga të shtënat dhe unë isha ende në gjendje shoku. Më besoni se jam ende në shok, isha shumë i frikësuar”.
Një banor tjetër i kësaj ane, ka treguar se edhe ai është zgjuar nga të shtënat me armë zjarri rreth mesnatës, duke shtuar se “ishte e zezë, nuk pamë askënd”.
“U dëgjuan vetëm të shtëna. Polici i plagosur qëlloi sulmuesin, me sa di unë dhe më pas erdhi për të kërkuar ndihmë”, potencoi ai.
“E pamë atë policin tjetër, ishte shtrirë. Nuk kishte shpëtim për të. Dorasi ishte shqiptar dhe ka ikur pas shtëpisë ku kanë ndodhur të shtënat”.
Ndryshe, forca të shumta policie janë parë nëpër rrugët e Loznicës dhe në një perimetër më të gjerë në kërkim të të dyshuarit për vrasjen e policit serb.
Po ashtu, siç raporton “N1”, janë vendosur postblloqe nëpër rrugë të ndryshme që të bëhet i mundur lokalizimi i të dyshuarit.
Një polic është vrarë dhe një tjetër është plagosur rëndë rreth orës 00:55 të enjten në Loznicë të Serbisë, derisa sipas ministrit të Punëve të Brendshme, Ivica Daçiç, i dyshuari është Artan Hajrizi nga Kosova.
“Policia në vend të ngjarjes ka gjetur pasaportën e të dyshuarit të lëshuar nga institucionet e Kosovës në emër të Artan Hajrizit, 33 vjeçar”, tha Daçiç për mediat serbe.
Raportohet se vrasja ka ndodhur rreth orës 00:55, kur zyrtarët policorë teksa kanë qenë duke kontrolluar veturat në një pikë kontrolli në Lipniçki Shor, e kanë ndaluar një veturë të tipit Mercedes me targa të Tutinit të Serbisë në të cilën kanë qenë dy persona.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com