Shqipëria

U akuzua për çështjen “Toyota Yaris”, Balla Bashës: Kallëzo penalisht Sali Berishën


Kreu i Grupit Parlamentar të Partisë Socialiste, Taulant Balla, nga foltorja e Kuvendit të Shqipërisë, i ka bërë thirrje kryetarit të Partisë Demokratike, Lulzim Basha, që të kallëzojë penalisht ish-kryeministrin Sali Berisha për çështjen e “Toyota Yaris”.

“Meqë Sali Berisha na akuzon të dyve për ‘Toyota Yaris‘ të bëjë të njëjtën gjë si unë dhe Basha. Unë e kallëzova në gjykatë edhe Basha duhet të bëjë të njëjtën gjë”, tha Balla.

Balla, duke ironizuar akuzën e Berishës ndaj kryedemokratit e quajti veprimin “karma”.

“30 vjet Sali Berisha çfarë nuk ka thënë për këtë pjesë në sallë, tani mbajeni me shëndet. Ka kohë të merret me ju me muaj e me vite dhe për gjërat që ju na keni akuzuar tani me pa të drejtë tani dëgjoni Saliun t’ua thotë ju”, deklaroi Balla nga Kuvendi.

Lideri historik i demokratëve ka akuzuar Bashën se, në bashkëpunim me Ballën, kanë ndarë shumën e parave të gjetura në makinat “Toyota Yaris”.

Ndër të tjera, kreu i grupit Parlamentar i bëri thirrje Bashës që të votonte ligjin “Për parandalimin e pastrimit të parave dhe financimit të terrorizmit”, pasi lidhet dhe me vetting-un e politikanëve.

“Sa i përket ligjit, ju ftoj ta votoni pasi lidhet me vetting-un e politikanëve. Kemi forcuar konceptimin e personit të ekspozuar politikisht dhe personat e lidhur me të”, theksoi Balla.

Ndërsa Basha më herët bëri thirrje që të pranohet vetting-u i politikanëve.

Në përfundim Balla kërkoi që çdo deputet duhej të vaksinohej dhe të respektohet Akti Normativ për mbajtjen e maskës në ambientet e mbyllura.

Kjo e fundit, sipas tij, nuk po respektohet as nga vetë deputetët në sallë, prandaj bëri thirrje se, në rast që kjo nuk do të përmirësohet, gjobat të fillojnë nga aty.

/Albanianpost.com


Lajmet kryesore