Shqipëria

Trupat në valixhe: Zbulohet vendodhja e Taulantit, zbardhet e shkuara


Taulant Pasho gjendet në një burg në Zvicër, në kantonin e Argau, ku po vuan që prej 16 tetorit një dënim për vjedhje dhe dëmtim të pronës.

Pas vënies në kërkim ndërkombëtar nga ana e policisë italiane, për shkak të gjetjes së katër valixheve me brenda trupat e copëtuar të prindërve të tij, Shpëtim dhe Teuta Pasho, ka qenë e mjenjëhershme përgjigja e Interpolit, duke gjetur vendodhjen e saktë të Taulantit.

Prej 2016-ës ai ishte në arrati nga policia italiane, pas thyerjes së arrestit të shtëpisë, nën akuzën e tregtimit të drogës. Në dy nëntor 2015, Taulanti u lirua nga burgu i Solliciano-s, datë kjo e cila përkon me zhdukjen e prindërve të tij pa lënë gjurmë.

Tashmë, pesë vite më vonë, çështja rihapet pas gjetjes së trupave të çiftit shqiptar, të copëtuar në mënyrë makabre dhe të ndarë në katër valixhe, të hedhura në një fushë pranë rrugës kombëtare që lidh Firenze-n, Pisa-n dhe Livorno-n.

Figura e 33 vjeçarit Taulant Pasho nuk është e panjohur për policinë italiane. Ai ka qenë disa herë i arrestuar për trafik narkotikësh dhe i liruar më pas me kusht. Në 2016, drejtësia italiane e dënon me tre vite e 11 muaj burg në mungesë dhe e shpall në kërkim.

Pikërisht kjo e shkuar e errët e tij, është ajo që e shtyn policinë italiane të mendojë se çelësi i zbardhjes së çështjes është ai.

Me zhdukjen e çiftit Pasho në dy nëntor 2015, disa ditë më vonë Taulanti do të kontaktonte avokaten e tij, Sabrina Del Fio.

“Jam shumë i shqetësuar, prindërit e mi janë zhdukur prej ditësh, nuk dihet ku janë. Ata nuk përgjigjen në telefon. Është e çuditshme, kjo nuk është mënyra si ata sillen zakonisht”, bënte me dije Taulanti avokaten e tij.

Vetë avokatja, kujton herën e fundit kur e ka parë Taulantin: “Më kontaktoi për një kafe në gjykatë, në Firenze. Përveçse folëm për çështej e tija ligjore, më vuri në dijeni dhe për çfarë po ndodhte me familjen e tij”.

Ndërkohë, hera e fundit kur ajo ka folur me Taulantin ka qenë rreth dy tre vite më parë, kur ai e kontaktoi nga një numër anonim për t’u informuar mbi akuzat që rëndonin mbi të. “Ishte një telefonatë e shkurtër. Më tha se nuk kishte pará dhe se ishte i dëshpëruar pasi ende nuk dinte gjë mbi zhdukjen e prindërve të tij”, deklaroi Del Fio.

Në pyetje është marrë dhe ish e fejuara e Taulantit, Elona, me të cilën ai jetonte deri në 2016-ën, kur mori dhe arratinë nga policia italiane.

“Shkruani vetëm që nuk jam unë personi i fundit që i ka parë. Për të tjerat flisni me avokatin tim”, deklaron Elona përpara organeve hetuese.

Por, policia, vë re se detajet e dhëna nga familjarët e Pashove dhe ish e fejuara e Taulantit nuk përputhen dhe ka kontradikta përsa i përket herëve të fundit që është parë çifti shqiptar.

Ajo që pritet tashmë është dëshmia e personit kyç, Taulantit, për të hedhur dritë mbi një ngjarje që ka shtangur një qytet të tërë dhe që po mban peshë një shtet të tërë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore