Tri institucionet kryesore në shëndetësi vazhdojnë të jenë pa drejtor, “emërimi i dy bordeve të fundit në ShSKUK me njerëz që njihen për keqmenaxhim”

Shërbimi Spitalor Klinik Universitar i Kosovës, Fondi i Sigurimeve Shëndetësore dhe Inspektorati Shëndetësor, institucionet më të rëndësishme për funksionimin e shëndetësisë në Kosovë, vazhdojnë të jenë institucione që operojnë vetëm me ushtrues detyre apo edhe pa udhëheqje fare.

Shërbimi Spitalor Klinik Universitar i Kosovës (SHSKUK), funksion me ushtrues detyre qysh nga muaji janar, ndërsa fondi i Sigurimeve Shëndetësore ka mbetur pa drejtor qysh nga viti i kaluar.

Për shkak të mos-emërimit të një kryeinspektori edhe Inspektorati Shëndetësor Funksionon me ushtrues detyre që nga 23 dhjetori.

“Funksionimi i institucioneve shëndetësore me ushtrues detyre, ka prapavijë politike”

Për ish ministrin e Shëndetësisë, Armend Zemaj, kjo udhëheqje me ushtrues detyre ka edhe prapavijë politike.

Zemaj, në një bisedë për Albanian Post, thotë se përgjegjësit e dështimeve në këtë sektor janë duke mbetur pa u ndëshkuar.

“Udhëheqja e tyre me ushtrues detyre për një kohë të gjatë ka prapavijë edhe të ndërhyrjeve politike por edhe të keq menaxhimit që këto dy vite janë prodhuar. Po ashtu, edhe dhjetëra skandale dhe përgjegjësia ka mbetur pezull se kush është titulluari dhe kush duhet të ndëshkohet për mos ushtrimin e detyrës sipas ligjeve në fuqi”, thotë Zemaj për AP.

Sipas Zemaj, një menaxhim i tillë e dëmton vetë ministrinë e Shëndetësisë, por që të njëjtit “s’kanë interesim për ta parë shëndetësinë në një situatë më të mirë sesa që është aktualisht”.

“Kjo qeveri tashmë është dëshmuar se nuk i intereson shumë dinamika ose menaxhimi institucional më shumë i intereson rehatia e njerëzve politikë të cilët i kalojnë filtrat e Vetëvendosjes në zyrat e tyre dhe deri atëherë kur gjendet një njëri i tillë i cili shërben ministrit dhe Qeverisë ose Vetëvendosjes është në rregull, por jo institucionit në fjalë dhe kjo është fatkeqësi.”

Ish ministri i Shëndetësisë i pyetur për afatin kohor të udhëheqjes me ushtrues detyre që duhet ta ketë një institucion thotë se afati kohor i përcaktuar është kaluar.

“Afatet janë të përcaktuara me ligje për pozita të larta dhe të gjitha afatet janë shkelur me dhjetëra herë do të thotë është tejkaluar të qenurit ushtrues detyre në një pozitë të tillë”.

Mirëpo, ai shton se edhe emërimi i dy bordeve të fundit në ShSKUK tregon që Qeveria nuk ka interesim për përmirësimin e sektorit të Shëndetësisë.

“Por, shpresa është humbur në kuptimin që bordet që janë të zgjedhur aktualisht – pra dy bordet e fundit – janë të njerëzve që gjatë kësaj periudhe janë shquar për keqmenaxhim, interferime politike dhe të cilat kanë prodhuar edhe skandale të cilat e kanë dëmtuar edhe vetë institucionin, qoftë Shërbimin Spitalor, por qoftë edhe Fondin për Sigurime Shëndetësore”.

“Dukuri e keqe”

Anëtari i Komisionit të Shëndetësisë dhe deputeti nga radhët e Partisë Demokratike të Kosovës, Shemsedin Dreshaj, konsideron se mos caktimi i udhëheqëve në këto pozita për një kohë të gjatë është “dukuri mjaft e keqe”.

“Mosemërimi është vërtetë dukuri e keqe, sepse nuk kemi nga kush të kërkojmë përgjegjësi për mosrealizimin e obligimeve të caktuara që dalin nga ligji dhe organizimi i punës”, thotë Dreshaj për Albanian Post.

Përveç mosemërimit të drejtorit në ShSKUK, Dreshaj shqetësim më të madh e ka edhe mungesën e drejtorit në Fondin e Sigurimeve Shëndetësore.

Sipas tij, në këto raste ekzekutivi dhe ministria e Shëndetësisë duhet të veprojnë me urgjencë.

“Shqetësuese është mosemërimi i drejtorit të Fondit të Sigurimeve Shëndetësore, pasi ky post ka mbetur vërtetë keq dhe sigurimet shëndetësore vërtetë nuk janë mirë. Unë mendoj që këtu duhet Qeveria dhe ministria të veprojnë sa më shpejt që është e mundur që të fillojnë këto procese”.

Teksa për emërimin e drejtorit në ShSKUK, ai ka bindjen se shumë shpejt do të emërohet drejtori i këtij institucioni, pas publikimit të emrave që kanë kandiduar për këtë pozitë.

“Emërimi i drejtorit të ShSKUK-së është në proces, sot janë bërë publik edhe kandidatët që kanë aplikuar dhe pritet që pas evidentimit të kandidatëve, përzgjedhjes pritet edhe emërimi”.

Edhe pse në mesin e atyre emrave ka nga ata që kanë udhëhequr në të kaluarën në këtë institucion, ai deklaron se kanë qenë vetëm “drejtor të teknikave” e “jo drejtor të ShSKUK-së”.

“Prandaj edhe nuk mund të parashikoj se a do të ketë progres pozitiv apo efekt negativ në këtë institucion”.

MSH-ja: Jemi të obliguar që derisa të zbatohet procedurat të mos mbesin pozitat e zbrazëta

Albanian Post ka kontaktuar ministrinë e Shëndetësisë për t’u informuar rreth një afati kohor se kur pritet të bëhet emërimi në pozita të drejtorëve në këto institucione, por nga ky institucion kanë thënë se janë konkurse që vazhdojnë të jenë në procedura.

“Konkursi për drejtor të ShSKUK është i hapur. Edhe konkursi për drejtor të FSSH gjithashtu në procedura”.

Teksa për emërimin në pozitën e kryeinspektorit nga MSH-ja është thënë se varet edhe nga ministria e Punëve të Brendshme.

“Konkursi për kryeinspektor shëndetësor është i hapur, pritet mbyllja e tij, Por, keni parasysh që rekrutimi i zyrtarëve në pozita të larta në administratën publike, kur nuk mund të bëhen rekrutime të brendshme, bëhet përmes Departamentit për menaxhimin e zyrtarëve publikë që është është në kuadër të MPB dhe nuk varet drejtpërdrejt vetëm nga MSH-ja”.

Ndërsa, për funksionimin e këtyre institucioneve për një kohë të gjatë me ushtrues detyre, MSH-ja ka pasur një sqarim.

“Edhe MSH-ja do të donte që rekrutimet të bëhen më shpejt, por është e obliguar që derisa të zbatohen procedurat, të mos le pozita të zbrazëta duke i zëvendësuar udhëheqësit me zyrtarë të tjerë”, thuhet në përgjigjen e MSH-së për AP.

Gjashtë kandidatë synojnë pozitën e drejtorit të ShSKUK-së

Gjashtë kandidatë janë përzgjedhur në listën për drejtor të Përgjithshëm të Shërbimit Spitalor Klinik dhe Universitar të Kosovës (ShSKUK).

Emrat e kandidatëve për këtë pozitë janë bërë të ditur në faqen zyrtare të ShSKUK.

Gjashtë kandidatë që janë duke aplikuar për këtë pozitë janë ish drejtorët e mëparshëm Basri Sejdiu e Basri Lenjani, kandidatë tjetër për drejtor të ShSKUK-së është edhe drejtori i Klinikës së Gjinekologjisë, Zef Ndrejaj.

Përveç këtyre, këtë pozitë e synojnë edhe Sanije Gashi, Haqif Arifi dhe Elvir Azizi.

Më 26 janar, Shërbimi Spitalor Klinik Universitar i Kosovës (SHSKUK), kishte konfirmuar raportimet se u.d e drejtoreshës së Përgjithshme të këtij institucioni Dr.Pranvera Zejnullahu-Raçi ka dhënë dorëheqje.

Teksa në këtë pozitë ishte emëruar si ushtruese detyre Narqize Arenliu-Hoxhaj.

Më 26 prill, ministri i Shëndetësisë Arben Vitia kishte emëruar bordin e ShSKUK pas një muaji mungesë.

Pas propozimit të Vitisë, Qeveria miratoi bordin e ri të SHSKUK-së.

Bordit të Shërbimit Spitalor Klinik dhe Universitar i kishte skaduar mandati më datë 27 mars 2023.

Bordi i cili është emëruar më datën 27.03.2020, e të cilit i kishte skaduar mandati, ka qenë me këtë përbërje: Aida Rexhepi, Agreta Gecaj-Gashi, Vjollca Kodolli, Xhevat Jakupi, Enver Gashi dhe një përfaqësues i MSH-së.

Opozita vazhdimisht e kishte kritikuar ministrin e Shëndetësisë, Arben Vitia për mosemërimin e bordit të ri të SHSKUK-së.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.