Trendafilova: S’është caktuar ndonjë vit për mbylljen e Gjykatës Speciale

Kryetarja e Dhomave të Specializuara të Kosovës (DHSK), Ekaterina Trendafilova, ka thënë se s’është caktuar as një vit për mbylljen e Gjykjatës Speciale dhe përfundimit të gjykimit ndaj ish krerëve të Ushtrisë Çlirimtare të Kosovës (UÇK).

Trendafilova, gjatë një interviste për Albanian Post, ka thënë se ky mandat të vazhdoj derisa të njoftohen institucionet e Kosovës, se hetimet kanë mbaruar.

“Nuk është caktuar një vit për mbylljen e gjykatës. Korniza ligjore, e miratuar nga Kuvendi i Kosovës, thotë se mandati i Dhomave të Specializuara të Kosovës dhe Zyrës së Prokurorit të Specializuar do të vazhdojë derisa Këshilli i Bashkimit Evropian të njoftojë autoritetet e Kosovës se hetimet kanë përfunduar dhe po ashtu procedurat kanë përfunduar”, ka thënë ajo.

Ajo e pyetur për bashkëpunimin që kanë me institucionet e Kosovës, vlerësoi se “është i mirë”, duke theksuar atë me Policinë e Kosovës.

“Ligji për Dhomat e Specializuara dhe Prokurorin e Specializuar parasheh që, duke iu nënshtruar të drejtave të të akuzuarve, të gjitha autoritetet në Kosovë do të bashkëpunojnë me DhSK-në dhe ZPS-në dhe do t’i përgjigjen çdo kërkese për ndihmë ose ndonjë urdhri apo vendimi të lëshuar nga DhSK-ja ose ZPS-ja”.

“Gjatë kryerjes së detyrave tona, për shembull, në të kaluarën kemi bashkëpunuar me Policinë e Kosovës, dhe kemi qenë shumë mirënjohës për ndihmën që na kanë dhënë”.

Nga mbi 300 dëshmitarë të Zyrës së Prokurorisë së Specializuar (ZPS), në çështjen gjyqësore ndaj ish-eprorëve të UÇK-së, deri tani janë dëgjuar 47 dëshmitarë – shqiptarë, serbë, ekspertë ndërkombëtarë, ish-komandantë të UÇK-së e viktima të pretenduara të luftës.

Ndërsa, të mërkurën pritet të vazhdojë dëgjimi i dëshmitarit të 48-të në rastin ‘Thaçi dhe të tjerët’.

Ish-presidenti i Kosovës, ish-kryeparlamentarët kosovarë dhe ish-shefi i deputetëve të Lëvizjes Vetëvendosjes (LVV), akuzohen nga e ashtuquajtura Gjykatë Speciale për vrasje, torturë e trajtim mizor, në rreth 40 qendra ndalimi në periudhën midis viteve 1998–1999.

Gjyqi ndaj ish-krerëve të UÇK-së nisi më 3 prill 2023, pas më shumë se dy vjet nga konfirmimi i aktakuzës.

Pse s’po hetohet rrjedhja e dokumenteve nga Specialja dhe kush vendosi të përgjohen Thaçi dhe të tjerët në burg? – Intervistë e Albanian Post me Ekaterina Trendafilova

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.