Tregu i lirë i punës Tiranë-Shkup-Beograd hapet më 1 mars

Shqipëria, Serbia dhe Maqedonia e Veriut kanë nënshkruar dy protokolle për krijimin e një tregu të lirë pune, si pjesë e nismës rajonale të Ballkanit të Hapur, i cili parasheh hapjen tërësore të një tregu të lirë pune që prej 1 marsit.

Lajmi u bë me dije gjatë një takimi të liderëve rajonalë në Shkup të hënën e 22 janarit, teksa e ka pohuar një fakt të tillë edhe qeveria serbe për mediat.

Presidenti i Serbisë, Aleksandar Vuçiç tha se këto dokumente do të mundësojnë që nga 1 marsi të hyjë në fuqi një treg plotësisht i lirë i punës në shtetet e Ballkanit Perëndimor.

Vendet ranë dakord për dy protokolle – një për akses të lirë në tregun e punës të Ballkanit Perëndimor dhe një tjetër për integrimin e një skemë elektronike identifikimi për qytetarët e rajonit.

Nisma rajonale e Ballkanit të Hapur mori formë në vitin 2019 kur Serbia, Shqipëria dhe Maqedonia e Veriut ranë dakord të krijojnë një zonë ekonomike për 12 milionë njerëz, duke hapur kufijtë e tyre si për njerëzit ashtu edhe për produktet.

Arritja e një marrëveshjeje të tillë ishte e ditur prej vitesh tashmë, kur Qeveria shqiptare, më 2 shkurt 2022 ka miratuar dy vendime për tregun e punës dhe identifikimin e elektronik të qytetarëve në Ballkanin Perëndimor.

Këshilli i Ministrave, pas propozimit të ministrit të Brendshëm të asaj kohe, Bledi Çuçi dhe ministres së Financave dhe Ekonomisë asokohe, Delina Ibrahimaj, vendosi miratimin e marrëveshjes për kushtet për akses të lirë në tregun e punës në Ballkanin Perëndimor.

Kështu, të gjithë qytetarët e vendeve të Ballkanin Perëndimor mund të lëvizin dhe punojnë duke shmangur burokracitë.

Një marrëveshje tjetër është ajo e ndërlidhjes së skemave për identifikimin elektronik të qytetarëve të Ballkanit Perëndimor.

Të gjitha këto në kuadër të nismës Open Balkan, iniciuar nga Shqipëria, Maqedonia e Veriut dhe Serbia.

Me anë të këtij vendimi, qytetarët nga të tre vendet do të mund të kenë akses të barabartë për leje pune dhe qëndrimi në të tre vendet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.