Tre muaj pa paga – situata në Trepçë e rënduar, Qeveria s’ju përgjigjet

Është muaji i tretë me radhë që minatorët e kompleksit metalurgjik “Trepça”, nuk kanë arritur t’i marrin pagat, ndërsa të njëjtit vazhdojnë të grevojnë deri në momentin kur situata do t’i kthehet normalitetit.

“Greva po vazhdon, minatorët vijnë në mëngjes, presin përgjigje, nëse nuk ka diçka konkrete për pagat ata shpërndahen”, ka thënë për Albanian Post, kryetari i Sindikatës së Minatorëve, Ibrahim Jonuzi.

Qeveria e Kosovës deri më tani nuk ka ndërmarrë asnjë hap konkret në këtë drejtim, ndërkaq Jonuzi alarmon se gjendja e minatorëve ka filluar të rëndohet, sidomos në aspektin psikologjik.

“Gjendja është e rënduar për shkak të mungesës së mjeteve financiare e ngarkesës e obligimeve bankare”, pohon ai.

Përveç se në gjendje të rënduar psikologjike e financiare, minatorët, sipas Jonuzit, i kanë humbur edhe shpresat meqë komunikimi me Qeverinë, në këtë fazë, “është zero”.

“Nuk kemi arritur të komunikojmë me Qeverinë, përveç me menaxhmentin, pra drejtorin e Minierës dhe me kryeshefin e ri ekzekutiv kemi pasur komunikim, por nuk ka prodhuar asnjë rezultat, situata është e paqartë”.

Ndërsa e ardhmja është e paqartë, Jonuzi potencon se aktualisht nuk ka asnjë indikacion që gjendja do të përmirësohet.

“Gjendja siç e thash edhe më herët është tejet e rënduar dhe nuk e dimë se si do të veprojmë në të ardhmen”, shtoi ai.

Qeveria e Kosovës ka deklaruar javën e kaluar në një deklaratë për shtyp se përkrahja financiare për ndërmarrjen “Trepça” varet nga zotimi se do të ulen shpenzimet dhe do rifillojë rritja e prodhimit.

Megjithatë njëri nga punonjësit në Trepçë, i cili çdo ditë udhëton nga Vushtrria në Mitrovicë për të kryer punën e tij kishte thënë për Albanian Post se gjatë këtij viti ka pasur shitje në “Trepçë”.

“Prandaj s’është aspak e arsyeshme mos pagesa e punonjësve”, vlerësonte ai.

Situata në Trepçë u komplikua edhe më shumë, kur gjykata vendosi që kryeshefi i emëruar për t’i zgjidhur problemet e “Trepçës”, Bashkim Kurti, doli se qysh nga janari kur u emërua pozitën e mbante ilegalisht, meqë nuk i plotësonte kushtet për atë pozitë.

Pastaj, me 2 gusht, Bordi i “Trepçës” njoftoi se në vend të Kurtit emërohet si ushtrues detyre i Kryeshefit, Faton Ahmeti, i cili kishte ushtruar padi ndaj Kurtit dhe gjykata i dha të drejtë në shkallën e parë.

Përkundër të gjitha zhvillimeve Kurti vazhdon të mos deklarohet për situatën, derisa gjatë fushatës zgjedhore e kishte vlerësuar si “krim të madh” mosinvestimin në Trepçë.

“Mosinvestimi në ‘Trepçë’ është një ndër krimet më të mëdha në Kosovën e pasluftës, sepse nuk është krim vetëm kur bën diçka keq por edhe kur s’bën diçka mirë, e ke përgjegjësinë për diçka të tillë”, ishte deklarata e kryeministrit të Kosovës, Albin Kurti, në janar të 2021-së, gjatë kohës kur ishte në opozitë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.