Gjatë shtatë muajve të parë të vitit 2023, numri i pasagjerëve në Aeroportin Ndërkombëtar të Tiranës “Nënë Tereza” është rritur në 3.7 milionë.

Për të njëjtën periudhë të një viti më parë, shifra ishte vetëm 2.7 milionë pasagjerë të regjistruar.

Kështu ka bërë me dije koncesionari i aeroportit, Tirana International Airport (TIA).

Vetëm në korrik, numri i pasagjerëve është rritur me 37 për qind nga viti në vit në 834 mijë e 794 pasagjerë të regjistruar.

Sakaq, koncesionari pret rreth 900 mijë pasagjerë në aeroport në gusht, një rritje prej 32 për qind krahasuar me të njëjtin muaj të vitit 2022.

Në vitin 2022, sipas të dhënave nga TIA, Aeroporti Ndërkombëtar i Tiranës “Nënë Tereza” ka pritur rreth 5 milionë pasagjerë.

Më 31 korrik organi evropian i tregtisë së aeroporteve “ACI Europe” ka publikuar raportin për trafikun ajror sa i takon muajit qershor dhe tremujorit të dytë të vitit.

Nga shifrat vërehet një rimëkëmbje e plotë e vëllimit të pasagjerëve, kjo krahasuar me periudhën para pandemisë.

Jashtë Bashkimit Evropian, performanca më e mirë e trafikut të pasagjerëve në qershor erdhi nga aeroportet në Shqipëri (+114.6%), e nxitur nga zgjerimi i Transportuesit Ultra-Low Cost.

Ndërkohë, aeroportet në Turqi (+0.6%) dhe Rusi (+0.4%) arritën një rikuperim të plotë.

Trafiku i pasagjerëve në rrjetin evropian të aeroporteve u rrit me +28,3% në gjysmën e parë të 2023-shit krahasuar me të njëjtën periudhë të vitit të kaluar.

Olivier Jankovec, Drejtor i Përgjithshëm i “ACI Europe”, theksoi se trafiku i pasagjerëve është rimëkëmbur gjatë gjashtë muajve të fundit, duke iu afruar gjithnjë e më shumë një rikuperimi të plotë.

“Megjithatë, viti 2023 nuk është 2019. Ka ndryshime të konsiderueshme në performancën në tregjet kombëtare dhe vëllimet mbeten ende nën nivelet e tyre para pandemisë për më shumë se gjysmën (52%) të aeroporteve të Evropës”.

Sipas tij, përveç ndikimit të qëndrueshëm të luftës në Ukrainë në disa tregje, kjo është kryesisht për shkak të modeleve të rimëkëmbjes që po bëhen strukturore.

Në qershor, performancat më të mira të trafikut të pasagjerëve në tregun e BE-së erdhën nga aeroportet në Greqi (+14.2%), Islandë (+9.3%), Luksemburg (+8.7%), Portugali (+8.1%) dhe Poloni (+6.3%) .

Trafiku i pasagjerëve në 5 aeroportet kryesore evropiane) në gjashtëmujorin e parë mbeti në -8.9% nën nivelet e tyre para pandemisë  – duke mos performuar kështu mesataren evropiane.

Ndër 10 aeroportet më të mira evropiane për trafikun e mallrave, performancat më të mira në gjysmën e parë krahasuar me vëllimet para pandemisë erdhën nga: Stambolli (+28%), Milano-MXP (+24%), Leipzig/Halle (20%), Madridi (+17%) dhe Koln-Bon (+14%).