Top Channel i mbetet Vjollca Hoxhës dhe familjes

Gjykata e Lartë ka marrë vendimin e prerë për të lënë median Top Channel në pronësi të Vjollca Hoxhës dhe trashëgimtarëve të themeluesit të Top Media, të ndjerit Dritan Hoxha: Lorela, Sara, Redia dhe Itan Hoxha.

Kështu ka mësuar Albanian Post përmes burimeve konfidenciale brenda Gjykatës, ku 18 janari ishte caktuar si dita për të shqyrtuar çështjen e lënë pezull prej kohësh.

Rezultati i trupës gjykuese, ka qenë dy në favor të Vjollca Hoxhës dhe një në favor të aksionerëve të tjerë, Albert Sinos dhe Aurel Baçit.

Kështu vjen edhe fundi i një kalvari të gjatë përplasjesh mes familjes Hoxha dhe dy aksionerëve të tjerë, të cilët përbëjnë edhe 60% të totalit të tyre.

Rrënjët e çështjes aktuale datojnë prej 9 majit 2016, kur administratorja dhe një prej aksionereve kryesore të kompanisë, Vjollca Hoxha, e veja e krijuesit dhe themeluesit të Top Channel, Dritan Hoxha, humbi gjyqin lidhur me aksionet e kompanisë.

Këto të fundit, pas ndarjes së parakohshme nga jeta të Dritan Hoxhës, si pasojë e një aksidenti automobilistik, përkisnin 40% në favor të Vjollcës si trashëgimtare (ku përllogaritej edhe pjesa e fëmijëve, ende jo madhorë në moshë) dhe 60%, në favor të Albert Sinos dhe Aurel Baçit.

Këta të dy, miq të vjetër të Dritan Hoxhës, i patën përftuar aksionet pas një shitje noteriale të vitit 2007.

Këtu nis pikërisht e gjithë çështja.

Sipas Vjollca Hoxhës, sot administratore e kompanisë, Sino dhe Baçi përfituan nga miqësia që kishin me Dritan Hoxhën, për shkak të kritereve ligjore të nenit 20 të ligjit Nr. 9742, datë 8 maj 2007, i cili kërkonte që asnjë subjekt në fushën e medias, të mos zotërohej për më shumë se 40% nga një person i vetëm.

Kështu pra, Dritan Hoxha u detyrua të mbante vetëm 40% në emër të tij dhe 60% të tjera t’i kalonte tek Sino dhe Baçi në mënyrë formale, sipas Vjollca Hoxhës.

Me ndarjen e parakohshme nga jeta të Dritanit, ndarja e aksioneve mbeti në kuotën 40% për Vjollca Hoxhën dhe 60% për Sinon e Baçin.

Në pretendimin e trashëgimtarëve të Top-it, kontrata e shitblerjes, e lidhur më 15 qershor 2007, para noterit Artan Treska, është absolutisht e pavlefshme, pasi është kryer në kundërshti me ligjin.

Mirëpo me rritjen e trashëgimtarëve të familjes Hoxha, nga ata vetë u kërkua që aksionet t’i kalonin atyre dhe jo personave të tjerë, të cilët gjenden aty vetëm prej babait të tyre.

Kështu çështja u çua në Gjykatën e Faktit (emërtuar kështu atëherë) dhe kjo e fundit vendosi kundër Hoxhës.

E gjitha në fakt filloi në janar të vitit 2016, pas largimit të administratorit të Top Channel asokohe, Enkelejd Joti, i cili i hapi rrugë emërimit me konsesus të zgjedhjes së Vjollca Hoxhës si administratore, nga mbledhja e aksionerëve.

Argumentimi i Gjykatës, ishte i lidhur me faktin se pretendimi i Vjollcës, duket të kishte lindur që brenda dy viteve prej ndarjes nga jeta të bashkëshortit të saj.

Por, edhe pas kësaj ngjarjeje, 12 mbledhje të aksionerëve ishin mbajtur dhe Vjollca Hoxha kishte dijeni për ndarjen e aksioneve.

Kështu, pretendimi i saj, nuk duhet të kishte ardhur pas tetë vjetësh, në vitin 2016, gjë që bëri edhe të rrëzohej çështja e më pas, të kërkohej dërgimi i saj në Gjykatën e Lartë.

Me vendimin e fundit të Gjykatës tashmë, Top-i do të vijojë të mbetet njësoj, nën drejtimin e familjes Hoxha.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.