![](https://albanianpost.com/wp-content/uploads/2024/07/IMG_7669.jpeg)
Reportazh i Corriere della Sera, nga Bethel Park, vendlindja e Thomas Matthew Crooks, 20-vjeçari që qëlloi Donald Trump në Butler.
Kazermat dhe objektivat ku Thomas Matthew Crooks shkoi për t’u ushtruar me pushkën e tij duken qartë pas tabelës në hyrje që thotë “Ndal, të gjithë anëtarët e klubit duhet të regjistrohen përpara se të vazhdojnë”.
Pikërisht në këtë pikë në Klubin e Sportistëve Clairton, presidenti Bill Sellito nxiton me pick up-in e tij sa herë që dikush afrohet, duke shpjeguar energjikisht se policia është në rrugë duke ardhur për kontroll.
Deklaratat zyrtare i janë besuar një avokati, por drejtuesi i qendrës i përsërit ato “Është një gjë e tmerrshme, një gjest i pakuptimtë dhune”.
Natë në Bingo
Klubi është i vendosur në një kodër të vogël gjysmë ore larg Bethel Park, periferia 30 kilometra në jug të Pittsburgh ku Crooks zvarriti jetën e tij në heshtje dhe vetmi.
Rruga e brendshme vazhdon përtej poligonit për pistoleta dhe pushkë dhe të çon në një qendër rekreacioni, tashmë e paarritshme për të huajt.
“Ky vend ekziston prej gati 100 vjetësh, ne jemi të frekuentuar nga fëmijë dhe familje, ka gjuajtje me hark dhe pjata apostafat prej balte”, përshkruan Sellito, duke vazhduar “katër forca të ndryshme policie vijnë këtu për të ushtruar, sot kemi mbrëmje për bingo”.
Nëse do të ishim në një vend tjetër, ata do të luanin lojë me birila. Por jemi në Amerikë dhe shumë vijnë të qëllojnë me Ar-15 si ai i përdorur në Butler nga Crooks.
Drejtuesit e atij poligoni nuk kanë dëshirë të flitet për ta si “palestra” e të riut që donte të vriste ish-presidentin Donald Trump.
Lagjia
Sellito nuk mund ta besojë nivelin ku ka arritur Amerika dhe bashkë me të po ashtu edhe fqinjët e Crooks, të cilët në kryqëzimin e Sylvania Drive me Milford Road tregojnë atë çfarë pak ka zbuluar bota për atë djalë ditët e fundit.
Thomas Crooks ishte si një hije që endej rreth Bethel Park. Njerëzit që pranuan të flisnin pothuajse gjithmonë e shihnin vetëm.
Liam Campbell, 17 vjeç, e kishte takuar atë në autobusin e shkollës “i ulur mbrapa, duke mos folur me askënd”.
As ai dhe as nëna e tij Kelly Little nuk kanë komunikuar ndonjëherë me Thomas dhe familjen e tij, edhe pse ata jetojnë 20 metra larg tyre.
Një fqinj tjetër, John Wolf, kujton se e shihte shpesh djalin duke ecur në rrugë, por mban mend t’i ketë folur vetëm një herë.
Wolf ishte konvaleshent nga një sëmundje dhe e pyeti të riun nëse mund ta paguante për të nxjerrë qenin e tij. “I urrej të gjithë qentë e ndyrë”, ishte përgjigja që mori.
Tabrlat në oborr
Zonja Little thotë se kohët e fundit Crooks kishin vendosur tabela pro-Trump në oborr.
Por brenda një ore nga momenti që kjo deklaratë qarkulloi në mediat lokale, dy aktiviste Maga (Make America Great Again) nxituan para shtëpisë së tyre.
Ato me një zemërim tepër të madh e mohuan atë deklaratë, duke ulëritur të vërtetën e të vetmit lider që thonë se i përgjigjen, i cili nuk është Donaldi, “por Zoti”.
”Ajo familje nuk ishte vërtet republikane, është e pamundur, është gënjeshtër”, bërtasin ato.
Befasia dhe tronditja tashmë janë kthyer në një betejë politike.
Dhe as parku i vogël, i qetë Bethel – sipas të dhënave të zgjedhjeve të fundit i ndarë saktësisht në gjysmë mes “të kuqëve” dhe “bluve” si Pensilvania, gjithmonë në bilanc në sondazhe – nuk është më ai që ka qenë më parë.
Por pika e kthesës nuk ka qenë mitingu i Butlerit dhe çka ndodhi aty.
“Ka qenë mirë që mendimet secili t’i mbajë për vete për një kohë të gjatë,” përsërisin të gjithë, Little, Wolf, presidenti i poligonit të qitjes.
“Diskutimet bëhen të dhunshme si kurrë më parë, në bare, në restorante”, thonë ata.
Dy ditët e fundit
48 orët e fundit të jetës së Thomas Crooks janë rindërtuar pjesërisht: pushka që ai kërkoi dhe e mori me hua nga babai i tij, i cili zotëronte të paktën një duzinë, udhëtimi në poligon (ku, megjithatë, ata vetëm konfirmuan se e kishin parë ” disa herë”), blerja e një shkalle nga Home Depot dhe një paketë municionesh nga Allegheny Arms and Gun Works, e konfirmuar nga menaxherët e dyqaneve për CNN.
Pastaj hija kthehet në errësirë. Dhe ai rishfaqet – siç e dimë – ndërsa përgatitet të ngjitet në fabrikën e xhamit të Butler.
Megjithatë, është më e vështirë të vihen bashkë mendimet e qitësit njëzetvjeçar, shenjat e asaj që bëri më pas, lëvizjet dhe studimi përgatitor për gjestin e tij.
Shumë pak del nga analiza që FBI po kryen për pajisjet e tij elektronike. Ndaj e vetmja përojelje është të përpiqemi të thellohemi edhe më tej në jetën e tij si adoleshent.
Roli i prindërve, të dy konsulentë psikologjikë, është ende i mbuluar me mister.
Një xhaxha tha se i kishte ndërprerë lidhjet prej vitesh me ta.
Më pas është shkolla, e cila tashmë ruhet nga policia. Një terapist në shkollën e mesme Bethel Park, Jim Knapp, tha për New York Times se ai kishte pasur biseda periodike me Crooks, por pa vënë re ndonjë element të madh shqetësimi ose izolimi nga shokët e tjerë të klasës.
Video e publikuar
Megjithatë, TMZ publikoi një video të disa viteve më parë që duket se e portretizon atë në banka, ndërsa disa shokë të klasës i tërheqin pantallonat dhe të tjerë bërtasin për të ndaluar.
“Ai ishte një i emargjinuar, ata talleshin me të”, thotë një ish shok i tij, Jason Kohler, për agjencinë Associated Press.
Grant Lewis, një student 17-vjeçar që është kthyer nga Italia, ku po përfundon dy vite të shkollës së mesme, thotë për Corriere della Sera se ai dhe Crooks punuan së bashku në Qendrën e Infermierisë dhe Rehabilitimit të Bethel Park.
“Ai ishte i qetë dhe i vetmuar, nuk fliste shpesh me mua. Por unë i njoh shokët e tij të klasës dhe edhe ata flasin për bullizmin në shkollë”.
Grant dhe miqtë e tij bëjnë shaka me njëri-tjetrin në restorantin në bllokun ngjitur me shtëpinë e të moshuarve, ku takohemi.
Ndoshta ata thonë diçka të gabuar dhe një fqinj rreth të 40-tave ngrihet dhe qëndron para tavolinës së tyre: “Kam vrarë më shumë njerëz në ushtri sesa ju që jeni ulur në këtë tryezë, mbajeni parasysh këtë dhe silluni më mirë”.
Djemtë ulin kokën: nuk ka asnjë fije ironie në fjalët e tij.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com