Federata Evropiane e Futbollit (UEFA), ka bërë me dije se ka filluar procedurat disiplinore për sjelljen e tifozëve serbë gjatë ndeshjes Serbi-Angli, në kuadër të Kampionatit Evropian të Futbollit, Euro 2024, që po mbahet në Gjermani.

Para fillimit dhe gjatë lojës tifozët serbë kanë shfaqur flamuj, slogane dhe thirrje me mesazhe politike, thirrje shoviniste dhe raciste kundër Kosovës.

Prandaj, më 17 qershor UEFA ka thënë se akuzat disiplinore kundër Federatës së Futbollit të Serbisë përfshinin hedhjen e gjësendeve dhe “transmetimin e një mesazhi provokues të papërshtatshëm për një ngjarje sportive”.

Hetimi përfshin pretendimin për “sjellje diskriminuese”.

Ndërsa, pak para kësaj, në lidhje me shfaqjen e mesazheve dhe thirrjeve shoviniste e raciste kundër shqiptarëve të tifozëve serbë kishte reaguar edhe Federata e Futbollit të Kosovës (FFK).

“Shfaqja e papenguar e mesazheve dhe thirrjeve të tilla në një event madhështor si Euro 2024 është e pakuptimtë dhe absurde. Përmes thirrjeve të tilla dëshmohet urrejtja e mbjellë në opinionin publik në Serbi ndaj fqinjëve të saj”, shkruhej në njoftimin e FFK-së, derisa kërkonin “masa të rrepta” disiplinore ndaj Federatës së Futbollit të Serbisë (FFS) për veprimet.

“Njëkohësisht, kërkojmë vigjilencë nga organizatori për të evituar shfaqjen e banderolave të tilla në ndeshjet e ardhshme, pasi ato përbëjnë shkelje të rëndë të rregullave të UEFA-s. Thirrjet kundër shtetit të Kosovës në një event madhor si Euro 2024 janë motivim për grupet nacionaliste dhe kërcënojnë sigurinë, edhe ashtu të brishtë të rajonit”, shtoi mes tjerash FFK-ja.

Flamuj të Serbisë mbi hartën e Kosovës nën mbishkrimin “Nuk ka dorëzim” janë shfaqur në stadiumin “Veltins-Arena” në Gelsenkirchen, ku Anglia dhe Serbia u përballen në kuadër të xhiros së parë të Grupit C në kuadër të “Euro 2024”.

FFK-ja ankohet në UEFA për thirrjet nacionaliste të tifozëve të Serbisë