Dhomat e Specializuara të Kosovës (DhSK), ua kanë vazhduar paraburgimin edhe për dy muaj të tjerë Hashim Thaçit dhe Kadri Veselit.
Lajmi është bërë i ditur përmes dy vendimeve të ndara nga DhSK-ja.
“Për arsyet e përmendura më lart, paneli urdhëron këtu: Vazhdimin e paraburgimit të z. Thaçi dhe urdhëron Prokurorin Special të paraqesë dorëzimet për shqyrtimin e ardhshëm të paraburgimit të z. Thaçi jo më vonë se të enjten, më 25 korrik 2024, në orën 16:00, me përgjigjen dhe kundërpërgjigjen që do të ndjekin afatin e përcaktuar në Rregullën 76”.
Sipas ZPS-së, paraburgimi ndaj tyre mbetet “proporcional” dhe “i arsyeshëm”.
“Veçoritë e veçanta në këtë rast përfshijnë: (i) Ndikimi dhe autoriteti i z. Thaçi; (ii) Njohuria e tij për akuzat dhe provat kundër tij, dhe një dënim i mundshëm i gjatë me burg; (iii) Rreziku që z. Thaçi të pengojë procedurat e Gjykatës Speciale; (iv) Rreziku i kryerjes, nxitjes ose ndihmës për krime të mëtejshme; (v)”.
Ndërsa është thënë se masat kufizuese në lirim nuk janë të mjaftueshme për të zbutur rreziqet.
“Rëndësia dhe kompleksiteti i akuzave kundër z. Thaçi; dhe (vii) Fakti që gjyqi është në zhvillim, duke demonstruar përparimin e arsyeshëm të procedurave”, thuhet në vendimin për vazhdimin e paraburgimit për Thaçin.
Zyra e Prokurorit të Specializuar (ZPS), ka dorëzuar një parashtrim përmes të cilit ka njoftuar panelin e trupit gjykues në rastin e ish-krerëve të Ushtrisë Çlirimtare të Kosovës, që nuk do të mbështetet në dëshminë e 10 dëshmitarëve.
Prej mbi 300 dëshmitarëve në total, deri tani janë dëgjuar 68 prej tyre – shqiptarë, serbë, ekspertë ndërkombëtarë, ish-komandantë të UÇK-së e viktima të pretenduara të luftës – kryesisht në seanca të mbyllura.
Ish-presidenti i Kosovës, ish-kryeparlamentarët kosovarë dhe ish-shefi i deputetëve të Lëvizjes Vetëvendosjes (LVV), akuzohen nga Zyra e Prokurorit të Specializuar (ZPS) për vrasje të pretenduara, torturë e trajtim mizor në periudhën midis viteve 1998–1999.
Në procesin gjyqësor që nisi më 3 prill 2023, katër ish-drejtuesit e UÇK-së u deklaruan të pafajshëm.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
