Thaçi: Duhet marrëveshje e fuqishme mes maqedonasve dhe shqiptarëve, duan të na sundojnë

Duhet marrëveshje e re mes shqiptarëve dhe maqedonasve – dy komunitetet më të mëdha në Maqedoni të Veriut – ku të dy palët janë në të gjitha format të barabarta, ka thënë Kryetari i Partisë Demokratike Shqiptare, Menduh Thaçi.

“Neve shqiptarëve të Maqedonisë na duhet marrëveshje e fuqishme me maqedonasit, ku do të jemi të barabartë tërësisht në ndarjen e interesave brenda shtetit të përbashkët, ku do të jemi me Kushtetutë të njëjtë, simbolika do të jetë e njëjtë, flamuri do kemi secili të veten, gjuhën e vet, interesat e vet”, ka thënë Thaçi.

Përndryshe, sipas tij, “kjo humbje kohe” me Marrëveshjen e Ohrit (marrëveshja që i dha fund luftës në Maqedoni, më 12 gusht 2001) 23 vjet, vetëm e vërteton “pashërueshmërinë e dëshirës së maqedonasve për të na dominuar dhe sunduar”.

“Ne herë pas here merremi me një parti të tyre [maqedonasve], po ky është qëndrimi i tyre. Qëndrimi i maqedonasve për të na dominuar neve si shqiptarë ka karakteristikat e shteteve totalitare, por mos të flas edhe të të shteteve apo perandorive diktatoriale”, shtoi.

Kjo, foli i prerë Thaçi, “duhet të ndalet”.

“Marrëveshja e Ohrit ishte një kompromis i detyrueshëm, i keq, jo i bollshëm për të drejtat e shqiptarëve. Dhe tash ne i vuajmë këto kompromise dhe këtë marrëveshje të keqe”.

Ndërsa, Kryetari i Bashkimit Demokratik për Integrim (BDI), Ali Ahmeti, ka thënë para dy dite se nëse maqedonasit dëshirojnë që të vazhdojnë që të jenë komb, duhet që të jenë në harmoni të mirë me shqiptarët, përndryshe do të gëlltiten nga serbët, bullgarët e grekët, pra s’do të ekzistojnë fare.

Këto komente, lideri i “Fronit Evropian” i ka bërë në Akademinë Solemne e organizuar në Shkup për nder të 23 vjetorit të Marrëveshjes Kornizë të Ohrit, e cila i dha fund luftës në Maqedoni (tani Maqedonia e Veriut).

“Maqedonasit, si komb, mund të përparojnë vetëm duke qenë në komunikim e harmoni të mirë e në marrëdhënie me shqiptarët, përndryshe, i gëlltisin serbët, bullgarët dhe grekët, dhe këtë që ua them këtu ua kam thënë të gjithë përfaqësuesve politikë të komunitetit maqedonas”, tha Ahmeti.

“Vetëm me ne (shqiptarët)”, insistoi lideri i BDI-së, “duke bashkëpunuar, duke bashkëjetuar mund ta ruajnë historinë e identitetin e tyre kombëtar, përndryshe, janë të destinuar të mos ekzistojnë fare”.

“Kështu që, le të jetë ky përkujtim i 23 vjetorit të Marrëveshjes së Ohrit, e cila ka meritë të veçantë që ky shtet nuk u nda, nuk u nda sepse nuk pranoi UÇK-ja, por pranoi barazi të plotë midis dy komuniteteve dhe komuniteteve të vogla në hapësirat e vogla ku jeton”, shtoi.

Prandaj, Ahmeti potencoi se “ne e mbrojmë, luftojmë që kjo marrëveshje as të mos cenohet as të mos rrezikohet sepse është shpëtim edhe për shqiptarët edhe për maqedonasit si dy komunitetet më të mëdha”.

Kreu i BDI-së, pati mesazh edhe për ata politikanë maqedonas që pretendojnë të zbatojnë politika të shekullit të kaluar në raport me shqiptarët.

“Pronësinë, të cilën e kanë menduar në vitet e 90-ta, le ta harrojnë, sepse pronarë jemi bashkë dhe bashkë i dalim zot edhe të mirës edhe të keqes”, deklaroi Ahmeti ndër të tjera.

Këto mesazhe të Ahmetit dhe Thaçit vijnë në një kohë kur Maqedonia e Veriut ka zgjedhur një qeveri të re, me kryeministër liderin nacionalist maqedonas, Hristjan Mickoski.

Për ta formuar qeverinë e tij, Mickoski ka zgjedhur partnerë qeverisës koalicion “VLEN”, duke anashkaluar kështu fituesin e zgjedhjeve “Frontin Evropian”, dhe duke shkelur parimin e fituesit me fituesin (te shqiptarët dhe te maqedonasit).

Gjatë gjithë fushatës zgjedhore për zgjedhjet e 8 majit, VMRO-DPMNE-ja dhe lideri i saj Mickoski kishin ndjekur linjën anti-shqiptare, posaçërisht kundër partisë më të madhe shqiptare BDI-së dhe liderit të saj Ali Ahmeti.

Ndërsa, me te marrë pushtetin, qeveria e Mickoskit, ka shkarkuar një numër të konsiderueshëm të shqiptarëve nga pozitat publike, duke i zëvendësuar ata me maqedonas e komunitete tjera.

Po ashtu, kjo qeveri ka ulur edhe përfaqësimin e shqiptarëve në institucionet publike, teksa ka rritur atë të maqedonasve dhe serbëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.