Tha se “prokurorë e gjyqtarë i kërkuan takime ‘me u marrë vesh disi’”, Albulena Haxhiut intervistohet për këtë deklaratë nga Specialja

20 ditë pasi Albulena Haxhiu, ministre e Drejtësisë, deklaroi në emisionin Debat Plus se “a mendon ti që unë nuk kam pasur raste, kur prokurorë e gjyqtarë më kanë çu fjalë për takim, me u marrë vesh disi”, Prokuroria Speciale e ka ftuar në intervistim për të dhënë llogari rreth këtyre deklarimeve publike.

Ministres i është kërkuar të jap detaje se kush kanë qenë prokurorët dhe gjyqtarët që kanë provuar ilegalisht t’i qasjen asaj.

Nga Specialja kanë konfirmuar për Albanian Post se ministrja është intervistuar lidhur me këtë deklarim të saj në RTV Dukagjini, por edhe për një status në Facebook për arratisjet e fundit nga burgjet e Kosovës.

Ajo shkroi se ka dorë Serbia në këto arratisje dhe se i ka bashkë-organizuar, prandaj prokuroria dëshiron të dijë më shumë edhe për këto “informacione” që Haxhiu tha se i ka, pa sqaruar mirë nga cili institucion.

“Me autorizim të Prokurorisë Speciale, sot është intervistuar Ministrja e Drejtësisë Albulena Haxhiu, me qëllim të sqarimit të  deklaratës së saj të dhënë në mediumin TV Dukagjini, në emisionin ‘Debat Plus’ më datë 02 Korrik 2024, lidhur me takimet dhe diskutimet e mundshme me prokurorë dhe gjyqtarë për raste të caktuara”, thuhet në përgjigje.

Në përgjigje po ashtu potencohet se intervistimi i ministres Haxhiut do të vazhdojë edhe të martën.

Të shtunën e 20 korrikut, ministrja Haxhiu, ka pretenduar se arratisjet e fundit nga burgjet e Kosovës i ka nxitur Serbia.

“Ky organizim konsiston në dhënien e garancisë që për personat e tillë territori i Serbisë, grupet kriminale atje, e nivele të caktuara të pushtetit, u ofrojnë mburojë nga ndjekja penale e Republikës se Kosovës”, shkroi ajo në Facebook.

“Mburoja nuk jepet vetëm ndaj mos-ekstradimit por ndaj çfarëdo bashkëpunimi informativ me organet e drejtësisë së Republikës së Kosovës”, shtoi.

Ndërkaq në një konferencë për media të dielën anëtari i Partisë Demokratike të Kosovës, Përparim Gruda, ka bërë thirrje që të shkarkohet ministrja Haxhiu.

“Nëse Serbia është prezente në burgjet e Kosovës, çfarë bën Ministrja e Drejtësisë në detyrën e saj? Kjo është pyetja themelore që ngre çdo qytetar sot. Kjo deklaratë ngre çështje serioze të sigurisë kombëtare të vendit dhe nuk mund të mbetet pa u sqaruar”, potencoi Gruda para gazetarëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.