Tha se Kurti është i shpallur “non-grata” nga SHBA-të – Arifi zbut qëndrimin: S’kam fakte, por e kam bindje

Qytetarët në Kosovë dhe Shqipëri e dinë që Shtetet e Bashkuara të Amerikës kanë shpallur persona non-grata Sali Berishën, por kryetari i Komunës së Preshevës, Shqiprim Arifi, ka befasuar të gjithë kur ka deklaruar se Berisha nuk është lideri i vetëm politik që ka emrin në këtë listë të zezë.

Në një intervistë për Euronews Albania, Arifi pohoi se edhe “Albin Kurti është non grata”.

Por, i pyetur nga Albanian Post të elaborojë më shumë rreth këtij informacioni, ai ka ngecur në shpjegim.

“Jo zyrtarisht është person non-grata në ShBA”, përsëriti ai, megjithatë fakte nuk ka.

“Unë e besoj që kjo është e vërtetë”, është argumenti i Arifit.

Bindja iu ka krijuar kur ka parë se “politikat që i bënë Albin Kurti në drejtim të Shteteve të Bashkuara të Amerikës, janë politika që e ndihmojnë  Rusinë më shumë se sa partnerin tonë”.

Përkundër se s’ka fakte, Arifi insiston. Thotë se edhe të tjerët do ta kuptonin për të vërtetë këtë që po thotë, nëse vetëm shohin pak veprimet politike të Kurtit.

“Duhet të lexohen zhvillimet e fundit, duhet të shihen takimet që janë bërë nga Albin Kurti, dhe tani mund të nxjerrim konkluzione. Si p.sh nuk kanë qenë në lutjet e mëngjesit në ShBA, nga 4 mijë zyrtarë që ftohen atje, vetëm Albin Kurti dhe Vjosa Osmani nuk kanë qenë aty”, deklaroi Arifi për AP.

Ndryshe nga çfarë thotë Arifi, SHBA-të asnjëherë nuk kanë lëshuar ndonjë dokument zyrtar që e listojnë kryeministrin e Kosovës në çfarëdo klasifikimi problematik për ta.

Përndryshe, ai edhe ka qenë në vizitë në SHBA, në maj të vitit të kaluar.

Në kohën e vizitës në Amerikë ishte diskutuar për udhëtimin e Kurtit dhe ishte shprehur kritikë për mungesën e takimeve me politikanë të profilit të lartë, por asnjëherë nuk është thënë se kryeministri i Kosovës është pjesë e ndonjë liste.

Ishte edhe një episod vitin e kaluar, kur disa ministra të Qeveritë nuk u lanë të udhëtojnë për në Uashington, por kjo ishte bërë për shkak të momentit delikat në të cilin ndodhej Kosova me çështjen e targave në Veri dhe jo për ndonjë qëndrim zyrtar refuzues të SHBA-ve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.