Teuta ka shënuar fitoren e parë të këtij sezoni në Abissnet Superiore, duke triumfuar në udhëtim te Egnatia me rezultat 1:2.
Ky ishte suksesi i parë i “djemve të detit” në këtë sezon, të cilët në shtatë ndeshjet e mëparshme, kishin regjistruar katër barazime dhe tre humbje.
Pjesa e parë nuk prodhoi gola, ndërsa fraksioni i dytë i takimit ishte shumë i bukur.
Të parët kaluan në avantazh vendasit me anë të Dzon Delarge në minutën e 64-të. Sulmuesi kongolez mori një asistim nga Emiliano Musta, kontrolloi bukur topin dhe e dërgoi atë në rrjetë me një goditje të saktë.
11 minuta para fundit të ndeshjes erdhi reagimi i Teutës, të cilët barazuan rezultatin me anë të Blerim Kotobellit, i cili shënoi njo gol shumë të bukur.
Me këtë gol, mysafirët morën zemër dhe në minutën e shtatë shtesë realizuan edhe golin e fitores.
Qendërmbrojtësi Artan Jazxhi shënoi me kokë pas një goditje këndi, duke i dhuruar fitoren e parë teknikut Bledi Shkëmbi dhe skuadrës së tij.
Thyhet pas pesë javësh Egnatia, që regjistroi disfatën e tretë sezonale, ndërkohë që Teuta mori një fitore të artë në udhëtim.
Ekipi i Bledi Shkëmbit është ngjitur në kuotën e shtatë pikëve, duke u renditur përkohësisht në vend të parafundit, dy më pak se Egnatia, që mbetet në shifrën e nëntë pikëve.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com