Kosova

Tetë problemet themelore të Albin Kurtit


(Autori është një zyrtar i lartë i një vendi mik të Kosovës)

  1. Ne nuk jemi kundërshtarë të Kosovës.

Nuk ka asnjë mënyrë tjetër për ta thënë këtë: Kurti është ndoshta i vetmi politikan shqiptar i Kosovës që e percepton Komunitetin Perëndimor si kundërshtar. Fatkeqësisht, Kurti është gjithashtu politikani i parë kosovar që ia ka arritur të bindë një pjesë të opinionit publik në Kosovë se Komuniteti Perëndimor, duke përfshirë disa nga aleatët kryesorë të Kosovës, po komplotojnë disi për të minuar shtetësinë e Kosovës. Është jashtëzakonisht e pakëndshme se si propaganduesit e Kurtit po e heqin ngadalë nga kujtesa kolektive e të rinjve kosovarë rolin vendimtar të Komunitetit Perëndimor në historinë e re të Kosovës. Lufta kundër armatës së Millosheviçit, miliarda dollarë për rindërtimin e Kosovës, mbështetja vendimtare për pavarësinë e Kosovës dhe procesin e ndërtimit të kombit duken të gjitha të pamjaftueshme për të merituar besimin e Kurtit.

  1. Dikush duhet të jetë mjaftueshëm i mirë.

Kurtit nuk i pëlqeu politika e Presidentit Trump për Kosovën. Prandaj ai favorizoi dhe bëri fushatë për Biden. Për ironi, tani ai nuk është i kënaqur as me politikën e Presidentit Biden për Kosovën.

Kurti pretendoi se kancelarja Merkel mbështeti autokratët në këmbim të stabilitetit. Disa thonë se Kurti dhe njerëzit e tij ishin të emocionuar me ardhjen në pushtet të kancelarit Scholz. Kurti tani nuk është i kënaqur as me politikat e Scholz.

Dikush duhet të jetë mjaftueshëm i mirë!

  1. Komplikimet e panevojshme vetëm e gërryejnë besimin ndaj Kosovës.

Me pëlqimin e tyre, zbatimi i Marrëveshjes Themelore tani është pjesë përbërëse e rrugës së anëtarësimit të Kosovës dhe Serbisë në BE. Themelimi i Asociacionit të komunave me shumicë serbe është obligim ndërkombëtar për Kosovën, i riafirmuar edhe në Marrëveshjen Themelore. Nuk ka rrugëdalje tjetër. Asnjë lojë fajësimi apo ushqyerje tensionesh nuk mund t’i çlirojë palët nga detyrimi për të zbatuar marrëveshjen. Komplikimet e panevojshme vetëm e gërryejnë besimin ndaj Kosovës.

  1. Peng i dizajnit të tij.

Komuniteti Perëndimor bëri një hap më shumë duke dhënë garanci të shumta, kjo në disa raste, se nuk do të lejonte përsëritjen e skenarit të Republika Srpska apo ndonjë gjë tjetër që cenon karakterin unitar të Kosovës. Megjithatë, ne nuk kemi nevojë për një marrëveshje ndërkombëtare apo një negociatë të lodhshme që zgjat një dekadë për të krijuar një organizatë të tipit OJQ. Kurti dhe zyrtarë të tjerë të Kosovës, qëllimisht neglizhojnë se edhe korniza ekzistuese ligjore ofron bazën për bashkëpunim dhe koordinim të gjerë ndërkomunal. Kurti e di se Asociacioni i komunave me shumicë serbe duhet të ketë karakter dhe kapacitet të dallueshëm ligjor dhe të ofrojë një kornizë të arsyeshme vetë-menaxhuese për serbët e Kosovës. Duke dhënë garanci publike se ASMM nuk duhet të cenojë karakterin unitar të Kosovës, Komuniteti Perëndimor bëri më shumë se mjaftueshëm. Nuk është detyra jonë ta çlirojmë Kurtin nga komplotet politike të disenjuara nga vetë ai. Kjo është mes tij dhe popullit të Kosovës.

  1. Mungesa e drejtësisë, faji i supozuar i bashkësisë ndërkombëtare.

A duhet të jemi më të ashpër ndaj Serbisë? A duhet të rregullohet politika e Komunitetit Perëndimor? Ndoshta po. Mirëpo, kjo gjë nuk i takon Kurtit dhe as nuk është problem i Albin Kurtit. Problemi i Kurtit është se ai duhet të bëjë pjesën e tij. Për shkak të kreativitetit të thellë të Kurtit për të komplikuar gjithçka, procesi i dialogut u zvogëlua në diçka që rrotullohet rreth gabimeve strategjike të Kosovës dhe jo rreth nevojave të Kosovës.

  1. Naiviteti perëndimor nuk është problemi i vërtetë.

Lufta në Ukrainë nuk ka të bëjë vetëm me Ukrainën. Ajo luftë ka të bëjë me drejtimin se ku po shkon bota nesër. Nëse Kurti është aleati ynë, ai duhet të fillojë të sillet si i tillë dhe të mos ligjërojë për gjëra përtej përshkrimit të detyrave të tij të punës. Çdo minutë e humbur në komplikime të panevojshme në Kosovë është një plus për kundërshtarët tanë.

  1. Injorimi i kufizimeve të Kosovës është i rrezikshëm.

Si kryeministër, njeriu duhet të njohë limitet e fuqisë të vendi dhe të popullit të tij. Askush nuk e konteston se Kurti është një individ i ditur me njohuri të gjera dhe të larmishme. Megjithatë, drejtimi i një shteti kërkon më shumë finesë dhe shumë më pak arrogancë sesa kryesimi i një debati intelektual. Demokratizimi i Serbisë, korrigjimi i kursit politik të komunitetit perëndimor dhe çështje të ngjashme, vështirë se janë pjesë e përshkrimit të detyrave të punës së Kryeministrit të Kosovës.

  1. Kosova nuk është superfuqi.

Nëse Kosova nuk ka një arsenal të fshehtë bërthamor, Kurti dhe të tjerët si ai, duhet të përpiqen ta gjejnë Kosovën në hartën e botës. Ky mund të jetë një moment kthjellues.

Albin Kurti’s eight fundamental problems

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore