Prodhuesi i automjeteve elektrike Tesla dorëzoi një rekord prej 466 mijë automjetesh në tremujorin e dytë të këtij viti, ndërsa prodhoi pothuajse 480 mijë prej tyre, duke tejkaluar pritshmëritë e analistëve.
Lajmi u bë i ditur nga agjencia “Reuters” dhe multimediali “CNN”.
Më shumë janë prodhuar dhe dorëzuar Model 3 sedan dhe Model Y crossover me 460 mijë e 211 të prodhuara dhe 446 mijë e 915 të dorëzuara.
Përveç kësaj, Tesla prodhoi 19 mijë e 489 modele më të shtrenjta Model X dhe Model S, dhe dorëzoi 19 mijë e 225 prej tyre, raporton Reuters.
Analisti i “Wedbush Securities”, Dan Ives e quajti atë një “tremujor trofe” për kompaninë.
Është arritur një dërgesë rekord e automjeteve, por kjo ishte e pritshme, shtoi ai, duke thënë se në Wall Street parashikohej dërgimi i rreth 447 mijë automjeteve.
Në prill, Tesla uli çmimet e automjeteve të saj për të pestën herë që nga fillimi i vitit, duke ulur kostot nga dy deri në pothuajse gjashtë për qind.
“Rënia e çmimeve nga fillimi i vitit 2023 ka qenë një fitore e madhe për Elon Musk dhe kompaninë, pasi kërkesa duket se mbetet shumë e fortë dhe efikasiteti i prodhimit ka lejuar dërgesa masive”, tha Ives.
Këto shifra janë dukshëm më të larta krahasuar me të njëjtën kohë të vitit të kaluar.
Në tremujorin e dytë të vitit 2022, Tesla raportoi 254 mijë e 695 automjete të dorëzuara dhe 258 mijë e 580 automjete të prodhuara.
Në tremujorin e parë të 2023, Tesla prodhoi rreth 441 mijë automjete dhe dorëzoi rreth 423 mijë të tilla.
Këtë vit, Tesla synon të dorëzojë gjithsej 1.8 milionë automjete, transmeton “CNN”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
