Tensionohet protesta e opozitës përpara Bashkisë – Demonstruesit kërkojnë të çajnë rrethimin, vijojnë molotovët

Ashtu siç patën paralajmëruar dhe ashtu siç është kthyer në traditë çdo javë, opozita po zhvillon protestë para Bashkisë së Tiranës.

Forca të shumta policore janë në gatishmëri, ndërsa qytetarët janë përpjekur të çajnë kordonin dhe kanë gjuajtur molotovë drejt ndërtesës.

Protestuesit kanë vendosur sipër njëra-tjetrës disa goma të vjetra.

Ata  nisur fillimisht me kore për dorëheqjen e kryebashkiakut Erion Veliaj e më pas kanë filluar hedhjet e para të shashkave, tymueseve dhe molotovëve.

Gjithsesi, përtej një acarimi fillestar, më tej protesta u zhvillua më e qetë – vetëm me fishekzjarre, ku eksponentë politikë demokratë dhe aktivistë, filluan të merrnin fjalën e të bënin thirrjet e tyre në këtë tubim.

Ndër ta, Belind Këlliçi i Partisë Demokratike.

Ai i ka drejtuar një paralajmërim të hapur Policisë së Shtetit nga protesta para Bashkisë së Tiranës.

“Guxoni prekni qytetarët, jeta është shumë e gjatë. Do e keni personale me qytetarët dhe Partinë Demokratike, qoftë ti Met Rrumbullaku qoftë ti Tonin Vocaj, qoftë ai hajduti i bashkisë”, tha Këlliçi.

Ndryshe nga herët e kaluara, protestuesit mbanin edhe flamujt të Partisë Demokratike, shtyrë edhe nga vendimi që i la vulën liderit historik të saj, Sali Berisha.

Më herët, Policia bëri me dije edhe planin e masave:

Duke nisur prej orës 09:30 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës.

Për këtë arsye sugjerohet që të përdoren rrugë alternative, deri në përfundim të tubimit, si Unaza e Mesme dhe Unaza e Madhe.

“Gjatë disa tubimeve të mëparshme, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë dhe vetë pjesëmarrësve në tubime”, thuhet në njoftimin e Policisë.

“Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore”.

Po ashtu Policia u ka drejtuar thirrje organizatorëve, drejtuesve dhe pjesëmarrësve në tubime për të respektuar ligjin dhe për t’u distancuar nga çdo akt dhune.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.