“Të gjithë jemi të zhgënjyer me dialogun, por s’duhet të heqim dorë”, intervistë e ish-presidentit slloven, Borut Pahor, për Albanian Post

Edhe pse e ka përfunduar mandatin si president i Sllovenisë dy vite më parë, Borut Pahor, ende i përcjellë zhvillimet politike në Evropë.

Ai tani ka themeluar Institutin “Miqtë e Ballkanit Perëndimor” për promovimin e dialogut, pajtimit, zgjidhjes paqësore të çështjeve të hapura, zhvillimit ekonomik dhe integrimit të vendeve të Ballkanit Perëndimor në Bashkimin Evropian.

Pahor, i cili ka pasur funksionet kryesore në politikën sllovene dhe si njëri nga figurat më të rëndësishme në politikën ballkanike, në një intervistë për Albanian Post ka folur për Marrëveshjen e Brukselit/Ohrit mes Kosovës dhe Serbisë e arritur gati një vit më parë.

Ndërkaq për mos zbatimin të kësaj dakoradance, ai i bën përgjegjës Kosovën dhe Serbinë, teksa thotë se të dyja palët duhet të fokusohen në zbatimin e marrëveshjes.

“Epo, nuk do ta nënvlerësoja përpjekjen e BE-së dhe vendeve anëtare të BE-së. Duhet të dimë një gjë: ata mund të ndihmojnë dialogun, por nuk mund të zëvendësojnë përgjegjësinë e Kosovës dhe Serbisë. Në këtë fazë, të gjithë jemi të zhgënjyer, por nuk duhet të heqim dorë. Përpjekja kryesore duhet të përqendrohet në zbatimin e marrëveshjes”, tha Pahor.

Kur pyetet për paralajmërimet për mundësinë e konflikteve në Ballkan, e ku zakonisht përmendet Kosova dhe Bosnja dhe Hergogovina, Pahor e sheh zgjerimin e Bashkimit Evropian si preventivë.

“Mendoj se duhet të bëjmë gjithçka që duhet për të ruajtur paqen dhe sigurinë. Mjeti kryesor për ta bërë këtë është zgjerimi i BE-së në të gjithë rajonin. Por ndërkohë, ka disa mundësi që gjërat të shkojnë keq”, potencoi ai.

Por, si një politikan i angazhuar për raporte të shëndosha në Ballkan, mendon se ka mungesë besimi nga të dyja palët, vendet e rajonit dhe Bashkimi Evropian.

“Rajoni nuk beson se zgjerimi i BE-së do të ndodhë ndonjëherë dhe BE-ja nuk beson se rajoni është gati të pranojë rregullat dhe të reformojë vetën. Këshilla ime do të ishte si vijon: BE-ja të thotë se do të jemi të përgatitur për zgjerimin në vitin 2030; kushdo që do të jetë i përgatitur të ndërhyjë do të marrë anëtarësimin”.

Megjithatë, ai insiston se e rëndësishme është që zgjerimi të mbahet lart në agjendë, teksa shton se “duket se për shkak të Ukrainës, kjo do të jetë më e lehtë, por mendoj se në përgjithësi do të jetë më e vështirë”.

“E di që është politikisht e pamundur të ndash zgjerimin e Ukrainës dhe Ballkanit Perëndimor, por unë do të bëj gjithçka që duhet në favor të këtij dallimi. Atëherë, mendoj se do të ishte më e lehtë për të marrë mbështetje për zgjerimin në Ballkanin Perëndimor. Jo se zgjerimi me Ukrainën nuk është gjeopolitikisht i rëndësishëm”, vuri re Pahor.

Në sytë e ish-presidentit slloven zgjerimi i Bashkimit Evropian në rajon nuk është i mundur pa Serbinë edhe pse e kjo e fundit është i vetmi vend i BE-së që si ka vendosur sanksione Rusisë pas pushtimit të Ukrainës.

“Më lejoni të jem i qartë për një gjë: zgjerimi i BE-së në rajon pa Serbinë nuk do të ishte i plotë. Në çdo mënyrë, nëse ky do të ishte vendim i BE-së apo i Serbisë, do të ishte shumë keq për paqen dhe stabilitetin e rajonit”, potencoi ai.

“Ne duhet të bëjmë pothuajse çdo gjë të mundshme për ta marrë Serbinë në anën evropiane dhe jo në anën ruse”.

Në këtë intervistë ai folur shkurtimisht edhe për sulmin terrorist të vitit të kaluar ndaj Kosovës në Banjë të Zveçanit nga një grup terrorist të prirë nga krimineli Milan Radojeçiç.

Pahor ka insistuar se duhet të bëhet gjithçka që mos të përsëritet Banja, ku mbeti i vrarë rreshteri Afrim Bunjaku.

“Unë kam qenë kritik për incidentin në Banjë dhe nuk duhet ta nënvlerësojmë”, përfundoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.