Të fillojnë bisedimet e anëtarësimit me Shqipërinë dhe RMV-në, thotë Parlamenti Evropian

Raporti për procesin e aderimit të Shqipërisë dhe Maqedonisë së Veriut në Bashkimin Evropian u miratua me shumicë dërrmuese në Parlamentin Evropian, me 519 vota pro, 52 kundër dhe 28 abstenime.

Në dy raportet e miratuara të enjten, të cilat vlerësojnë progresin e Shqipërisë dhe Maqedonisë së Veriut në rrugën drejt anëtarësimit në BE, Parlamenti i kërkon Këshillit të nisë zyrtarisht negociatat e anëtarësimit me këto dy vende.

Ata kanë vënë në dukje kontekstin gjeostrategjik të marrëdhënieve me Rusinë dhe agresionin e saj kundër Ukrainës.

Eurodeputetët i bëjnë thirrje BE-së për të vlerësuar në mënyrë kritike implikimet historike të rëndësishme të sigurisë së një vendimi të tillë për stabilitet dhe unitet në kontinentin evropian dhe në Ballkanin Perëndimor.

Gjithashtu kanë vlerësuar “orientimin strategjik dhe angazhimin e palëkundur të Shqipërisë për integrimin evropian”, duke shprehur “mbështetjen e tyre të qartë për transformimin demokratik të vendit dhe aspiratën për anëtarësim në BE”.

Nuk ka munguar dhe thirrja nga ana e tyre që Shqipëria të vazhdojë dhe të intensifikojë përpjekjet e saj për të funksionuar në mënyrë më efikase gjyqësore, për të forcuar demokracinë, shtetin e së drejtës dhe ekonominë.

“Raporti im për procesin e aderimit të Shqipërisë në Bashkimin Evropian sapo u miratua nga seanca plenare e Parlamentit Evropian me shumicë dërrmuese. Evropa nuk mund të zhgënjejë popullin shqiptar dhe një vend që është përpjekur të zbatojë të gjitha hapat e nevojshëm për pranimin. Koha për të kaluar në negociata formale”, shkroi Santos.

Raportuesja e Parlamentit Evropian për Shqipërinë, Isabel Maria Santos, gjatë seancës plenare të PE-së, ka prezantuar gjetjet në lidhje me ecurinë e vendit në lidhje me procesin e integrimit.

Ajo apeloi për mbajtjen e menjëhershme të Konferencës së Parë Ndërqeveritare midis Shqipërisë dhe Bashkimit Evropian brenda Presidencës Franceze të Këshillit Evropian.

Edhe përfaqësuesi i Komisionit Evropian, Didier Reynders , theksoi vendosmërinë në plotësimin e kushteve nga ana e Shqipërisë për mbajtjen e Konferencës së Parë Ndërqeveritare, dhe kërkoi mbajtjen e Konferencës së Parë Ndërqeveritare me Shqipërinë sa më parë.

Pas miratimit, kreu i Grupit Parlamentar i Partisë Socialiste, Taulant Balla, e ka përshëndetur miratimin e raportit.

“Përshëndes qëndrimin e Parlamentit Evropian, i cili me votimin historik të ditës së sotme me 519 vota pro vlerësoi orientimin strategjik dhe angazhimin e palëkundur të Shqipërisë për integrimin evropian”.

Sipas tij, në kushtet ku Shqipëria dhe Maqedonia e Veriut i ka plotësuar të gjitha kushtet e vendosura për mbajtjen e Konferencës së Parë Ndërqeveritare, Parlamenti i kërkoi Këshillit të hapë zyrtarisht bisedimet për anëtarësim me të dy vendet, për shkak se mosmarrja e një vendimi minon besueshmërinë e politikës së zgjerimit.

“Falënderues ndaj Raportueses së Parlamentit Evropian për Shqipërinë, Isabel Maria Santos për profesionalizmin në prezantimin e gjetjeve të raportit dhe në kërkesën për mbajtjen e menjëhershme të Konferencës së Parë Ndërqeveritare midis Shqipërisë dhe Bashkimit Evropian brenda Presidencës Franceze të Këshillit Evropian”, shkruan Balla.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.