Taylor Swift e ftuara speciale e dasmës sekrete të Lena Dunham me Luis Felber

Vikendi që lamë pas, ishte një fundjavë e “vajzave” si asnjëherë tjetër.

Kjo pasi që gjatë fundjavës që iku, këngëtarja e famshme,Taylor Swift ishte mysafire nderi në dasmën sekrete të realizuar në Londër të mikeshës së saj të njohur, aktores, Lena Dunham, e cila u martua me muzikantin Luis Felber.

Ylli i hitit “Look what you made me do”, nuk ka interpretuar ndonjë nga këngët e saj në dasmën e të shoqes, për arsye të protokolleve strikte të COVID-19 dhe po ashtu për shkak të një problemi shëndetësor të saj.

Madje, Swift, në ceremoninë e kurorëzimit të Dunham, ishte e vetme dhe pa të dashurin e saj me të cilin jemi mësuar ta shohim prej kohësh, aktorin, Joe Alwyn.

“Lena dhe Luis donin ta mbanin dasmën të vogël dhe private, vetëm për ta dhe familjen dhe miqtë e tyre më të ngushtë”, tha një burim pranë të së përditshmes “Page Six”.

E se Swift dhe Dunham duhen shumë në mes vete, ajo dihet botërisht, kjo pasi që ajo vendosi që ta bëjë aktoren pjesë të performancës së saj “Bad Blood”, të lansuar në vitin 2015, pjesë e të cilit ishin edhe disa yje të famshme të muzikës dhe modele të njohura.

“Realisht është vërtet e mrekullueshme të kem dikë si Lena Dunham në jetën time”, pati thënë Taylor në një intervistë të dhënë kohë më parë.

Ndërkaq, kur jemi tek dasma e aktores së njohur amerikane, prindërit e Dunham, artistët Laurie Simmons dhe Carroll Dunham, fluturuan po ashtu drejt Mbretërisë së Bashkuar për martesë së bashku me vëllain e saj, Cyrus Grace Dunham.

Udhëzimet aktuale kundër Coronavirusit, nënkuptonin se ata nuk duhej të karantinoheshin nëse vaksinoheshin dhe duhej të testoheshin vetëm ditën e dytë të udhëtimit të tyre.

Edhe prindërit e Felber, Alma dhe Roger Felber, të cilët jetojnë në Mbretërinë e Bashkuar, ishin gjithashtu atje së bashku me motrën e tij, por jo edhe vëllain e tij.

Burimet thanë se për shkak të shqetësimeve për COVID-19, të gjithë mysafirët duhej të provonin se ishin të vaksinuar dhe duhej t’i nënshtroheshin testeve për të treguar se nuk kishin asnjë gjurmë të virusit.

Në anën tjetër, aktualisht, Dunham është imunokompromentuar dhe kohët e fundit shkroi se jeta ka qenë jashtëzakonisht e vështirë për të në mes të pandemisë.

Po ashtu, Dunham ka luftuar një sërë sëmundjesh, përfshirë endometriozën e rëndë që çoi në një histerektomi në vitin 2018, ndërsa për momentin, ajo vuan nga sëmundja kronike sindromi Ehlers-Danlos dhe u infektua me COVID-19 në muajin mars të vitit që lamë pas.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.