Tatimi në pronë, tema kryesore e diskutimit në Kuvend të Kosovës këtë të enjte

Kjo e enjte do të mbledhë përfaqësuesit e popullit në kuvend për të diskutuar një temë të rëndësishme për qytetarët e Kosovës.

Në seancën plenare të rregullt, të kësaj jave, deputetët do të shqyrtojnë projekt rezolutën për adresimin e çështjes së rritjes së faturave të tatimit në pronë.

Pas vendimit të Ministrisë së Financave për rivlerësim të pronave e cila rrjedhimisht solli rritjen e në disa raste edhe dyfishimin e çmimit të tatimit në pronë. Ministri Hekuran Murati vendosi që të falë nga 100 euro për të gjithë qytetarët e prekur nga kjo ngritje.

“85 për qind e tatimpaguesve nuk do të paguanin asgjë për vitin 2023, ata që tashmë kanë paguar, u llogaritet si parapagim për vitin vijues. 10 për qind  të tjerë do të paguanin më pak se 100 euro për vitin 2023”, kishte shkruar Murati më 28 janar.

Kundër të dy vendimeve të Ministrisë së Financave u deklarua opozita.

PDK kishte kërkuar nga qeveria që të shfuqizonte vendimin për rivlerësimin e pronës dhe të mos aplikonte asnjë masë për “lehtësime” duke u hequr nga 100 euro qytetarëve që tashmë u është rritur fatura.

“Qeveria e Kosovës po e zhytë vendin nga kriza në krizë, ndërsa për të gjitha krizat e ka pothuajse përgjigjen e njëjtë, shpërndarjen e 100 eurove që tashmë po paraqesin instrumentin më të dalluar të politikë-bërjes ekonomike të kësaj qeverie e të cilat në asnjë rast nuk kanë arritur të adresojnë nevojat e qytetarëve”, kishte thënë Arben Mustafa, Koordinator i Departamentit për Financa në Kabinetin për Qeverisje të mirë në PDK.

Ish-kryeministri i Kosovës, Avdullah Hoti, kishte ironizuar me rastin duke thënë se qeveria e nisi vitin mbarë.

“I dyfishojnë faturat e tatimit në pronë, në veçanti për zonat urbane. Si arsyetohet kjo në krizën më të madhe të çmimeve në 15 vitet e fundit?”, kishte shkruar Hoti në Facebook.

“Me dhunë e përmes ligjit, financat e qytetarëve po barten nga xhepi i tyre në arkën e shtetit dhe në fund as nuk shpenzohet buxheti dhe as nuk mbështetet qytetari i Kosovës”, kishte deklaruar kreu i AAK-së, Ramush Haradinaj.

“Mirë po e gënjen popullin. I mirë është edhe në veprime që janë në kundërshtim me premtimet dhe me Republikën e Kosovës”.

Për këtë rast kishte reaguar edhe drejtori ekzekutiv i Asociacionit të Komunave të Kosovës, Sazan Ibrahimi, duke kërkuar sërish sqarime nga Qeveria e Kosovës për faturat në pronë dhe për atë se çka do të vendoset të bëhet në këtë drejtim.

Ibrahimi kishte shprehur shqetësimin se “qytetarët nuk po dinë t’i paguajnë apo jo faturat e tatimit në pronë, apo të pritet ndryshimi i ligjit në pronë”.

“Bordi i Asociacionit të Komunave të Kosovës, që i përfaqëson Komunat e Kosovës, ka kërkuar nga kryeministri Kurti dhe ministri Hekuran Murati, që vendimin për rivlerësimin e pronave e cila ka ndikuar në mënyrë të drejtpërdrejt në ngritjen enorme të faturave të tatimit në pronë të pezullohen”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.