Tatëpjeta e Onkologjikut

Disa javë deri në disa muaj.

Kjo është lista e pritjes për pacientët me kancer në spitalet e Japonisë, Zvicrës, Singaporit dhe Gjermanisë.

Vende ku sistemi shëndetësor është i mirëstrukturuar dhe me një teknologji të avancuar.

Mirëpo këto vende lihen pas nga Shqipëria, ku sipas shefes së Onkologjikut, “ne i jemi i vetmi vend në botë që nuk kemi radhë pritje”.

“2-3 javë nuk quhet radhë”, tha Silvana Çeliku në raportimin e saj përballë anëtarëve të Komisionit të Shëndetësisë.

Me të drejtë nuk ka radhë pritje, pasi në Shërbimin Onkologjik ashtu siç është zbuluar ligjërisht nuk ka shërbim.

Mjaftoi një hetim i zhvilluar muaj më parë për të nxjerrë në dritë se uniformat e bardha nuk u ofronin pacientëve shërbim duke i drejtuar ata në klinikat private, ku pas dyerve i prisnin po ato mjekë.

Hetimi i Prokurorisë së Tiranës zbuloi se si mjekët e spitalit të Onkologjikut shisnin ilaçet e spitalit te subjektet private.

Dhe vijmë te deklarata e Çelikut: A ka mungesa? Po ka, këtë nuk e fshehim.

Shefja e Onkologjikut e çon më tej pohimin e saj duke e pranuar se do të vijojë të ketë mungesë ilaçesh për pacientët që trajtohen me kancer.

Aktualisht sipas raportimeve pranë Albanian Post, pacientët kanë hasur në mungesë të gemcitabinës, irinothecan-it dhe herceptin-s.

Të tria tepër të rëndësishme për trajtimin e tyre.

E kur vjen puna për mungesën e ilaçeve, Shqipëria lirisht mund të krahasohet me vendet e Afrikës dhe vendet në konflikt lufte (ku shpesh raportohet për vështirësi të theksuar në sigurimin e ilaçeve).

Por sërish mbetet e vështirë të bësh krahasime pasi në Shqipëri për më shumë se dhjetë vite nuk ka pasur asnjë të dhënë mbi situatën e trajtimit të pacientëve me kancer në pavijonin e Onkologjisë.

Kjo u zbulua nga një auditim i kryer nga Këshilli i Lartë i Shtetit.

Situata e përshkruar në raportin e tij të fundit ishte alarmante:

-Kostoja e depstimit për kancerin e qafës së mitrës është rritur me 261 herë nga 2020 -2021, Kontrolli i Shtetit vëren se shifrat e kostove për këtë vit, janë të paargumentuara dhe të pajustifikuara nga Ministria e Shëndetësisë.

-Onkologjiku nuk ka në përbërje organikën e duhur mjekësore, ka mungesë stafi dhe shumë ngarkesë.

-Mungojnë disa nga pajisjet më të rëndësishme mjekësore.

-Gjatë vitit 2020-2022, 600 gra të prekura nga kanceri gjinekologjik nuk u trajtuan me radioterapi, sepse mungon pajisja e brakiterapisë.

-Nuk është vendosur në punë aparati i Ortovoltazhit, që trajton kancerin e lëkurës, për këtë arsye u lanë pa shërbim 200 pacientë të prekur nga melanoma.

-Ka mungesë të shtretërve spitalorë për realizimin e seancave të kimioterapisë dhe radioterapisë dhe mungesë të sistemit të kondicionimit.

Këto janë vetëm disa nga gjetjet e KLSH-së (për të moslistuar praninë e lagështirës, papastërtinë, apo cilësinë).

Por në raportimin e saj mjekja Çeliku e pa të udhës të vinte fokusin diku tjetër, te fakti se “jo çdo rast kanceri duhet trajtuar me KEMP”.

“Problemi i KEMPI-t unë kam opsionin tim, të sëmuresh me kancer nuk do të thotë je i paaftë për punë. A kur je duke vdekur, ky pastaj ndryshon..!”, ishin fjalët e shefes së Onkologjikut (referuar kryesisht kancerit të mitrës).

Me pak fjalë shefja e Onkologjikut anulon jo vetëm dramën fizike, por edhe atë psikologjike që një sëmundje si kjo shkakton te i sëmuri dhe familja e tij.

Këtu listës së mungesave mund t’ju shtohet edhe diçka tjetër: Një i kuruar në Itali, si rezident atje, tregon për AP-në se nuk ka një listë pritje për sëmundjet onkologjike, madje në momentin e parë të diagnostikimit pacienti çlirohet nga çdo lloj pagese (ato publike) për të gjitha kurat apo analizat. Veçmas kësaj, ka edhe mbështetje psikologjike brenda sistemit publik.

Kjo e fundit nuk llogaritet fare në listën që spitali ka, por kalon pa u vënë re dhe nga përfaqësuesit e qytetarëve shqiptarë në Kuvend.

Mazhoranca, e kuptueshme se pse, ndërsa opozita u duk e lodhur në fundin e seancës.

Pasi kishte dëgjuar më shumë se dy orë raportim për një nga çështjet që prek qytetarët, shumica e anëtarëve të saj u larguan.

Njëjti si braktisja në Kuvend kur po flitej pikërisht për këtë çështje.

Mbetet ashtu siç KLSH pohoi: Situata në Onkologjik është pika fundore e përgjegjësisë.

Onkologjiku kalon në duart e SPAK, nisin hetimet

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.