Kosova

Takimi i 26 qershorit, Haliti: Kurti e Vuçiç të kuptojnë se marrëveshjet janë obligim e duhet zbatuar


Xhavit Haliti

Deputeti nga radhët e Partisë Demokratike të Kosovës (PDK), Xhavit Haliti, ka thënë se Albin Kurti dhe Aleksandër Vuçiç, ka thënë se duhet ta kuptojnë se marrëveshjet e arritura në kuadër të dialogut Kosovë-Serbi, të ndërmjetësuar nga Bashkimi Evropian, janë obligim dhe duhet të zbatohen.

Këto komente, Haliti i ka bërë përmes një postimi në Facebook, duke komentuar takimin e 26 qershorit në mes të Kurtit dhe Vuçiç-it, në kryeqendrën evropiane, Bruksel.

“Është e domosdoshme që Kurti e Vuçiç të takohen e të vazhdojnë bisedimet. Edhe ashtu, Kurti ka qenë gjithnjë i angazhuar në dialog nëpërmjet zëvendëskryeministrit Besnik Bislimi”, shkroi fillimisht Haliti.

Sipas tij, është koha që Kurti të jetë kontribuues i drejtpërdrejtë, “duke marrë parasysh përgjegjësitë kushtetuese që ka si kryeministër dhe domosdoshmërinë e të kuptuarit që Kosova ka vetëm një rrugëtim dhe drejtim”.

“Kushdo që përpiqet t’i shmanget të qenurit tërësisht në orientim e rrugëtim të kundërt nga SHBA e BE, është me dikënd tjetër, por jo me popullin e Kosovës”, shtoi.

Në prizmin e deputetit të PDK-së, interesi nacional i Kosovës është bashkërenditja e vendimeve sipas porosive të Shteteve të Bashkuara të Amerikës dhe Bashkimit Evropian.

“Besoj që ky takim nuk do jetë betejë përplasjesh me ‘mullijtë e erës’, por që të dyja palët do ta kenë kuptuar që marrëveshjet janë obligim dhe duhet të zbatohen. Jo për interesa elektorale, por për interesa të të dyja vendeve”, përfundoi.

Ndryshe, të enjten, u njoftua se më 26 qershor, me ndërmjetësimin e Bashkimit Evropian, në Bruksel, do të ketë takim të radhës Kurti-Vuçiç, në kuadër të dialogut Kosovë-Serbi.

Lajmi është konfirmuar nga zëdhënësi i BE-së, Peter Stano, për “Radio Evropa e Lirë”, i cili ka thënë se dialogu do të ndërmjetësohet nga Përfaqësuesi i Lartë i Unionit për Politikë të Jashtme dhe Siguri, Josep Borrell.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore