Ish kryenegociatorja e dialogut në dialogun me Serbinë në Bruksel, Edita Tahiri, pas ngjarjeve që ndodhen të dielën në Veri, ka kërkuar që të veprojnë partnerët ndërkombëtarë që Kosova të anëtarësohet në NATO.
Tahiri përmes një shkrimi në rrjetin social ‘Facebook’, ka vlerësuar se vetëm kështu mund të ndalet Serbia.
“Tash duhet të veprojnë partnerët strategjik Amerika dhe NATO ta anëtarësojnë Kosovën në NATO, sepse vetëm kështu Serbia ndalet, me qëllim që të ruhet paqja në Ballkan e arritur pas luftërave të Pavarësisë së shteteve përfshirë Kosovën që u pagua shumë shtrenjtë me gjenocid të përjetuar”.
“Duhet të shpejt të veprohet”.
Dita e hënë (25 shtator) do të jetë ditë zie kombëtare në nderim të pjesëtarit të Policisë së Kosovës, Afrim Bunjaku, i cili u vra në pjesën veriore të Kosovës të banuar kryesisht me serbë etnikë pas një sulmi të organizuar nga një grup kriminal ende i paidentifikuar saktë për organet e rendit. Ishte një sulm terrorist.
Gjithçka filloi në orët e para të mëngjesit të 24 shtatorit, kur një grup i armatosur rëndë në hyrje të fshatit Banjskë të Zveçanit – komunë e banuar me shumicë serbe – qëlluan me armë zjarri mbi trupat e Policisë së Kosovës, duke shuar jetën e një zyrtari policor.
Grupi që ngriti në nivele të larta shkallën e egërsisë në veri, sipas autoriteteve kosovare, nuk ka qenë në përbërje të civilëve të rëndomtë që ngrenë krye herë pas here në këtë zonë, por ka ngërthyer brenda vetes së paku 30 pjesëtarë të trajnuar, ushtarakë e paramilitarë serbë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
