Tahiri për deklaratën e Macronit: Njëherë Çakorri e tash Asociacioni si kusht për liberalizimin e vizave

Ish-kryenegociatorja e Kosovës në dialogun me Serbinë në Bruksel, Edita Tahiri, ka reaguar pas deklaratës së presidentit të Francës, Emmanuel Macron i cili ka deklaruar se Franca ka pezulluar procesin e liberalizmit të vizave, meqë Kosova nuk e ka mbajtur fjalën e dhënë.

Tahiri përmes një shkrimi në rrjetin social ‘Facebook’, ka thënë se sërish kanë vendosur kushte të reja për liberalizimin e vizave.

“Ishte qakori, tash asociacioni si kusht për liberalizimin, demarkacioni u mbërri bënë kompromis ata që e kundërshtonin, tash radha te Kurti – Macron paska thënë hapur kushtin kryeministrit dhe presidentes si dhe ka thënë se ata kanë premtuar, por se kanë mbajtur fjalën”.

“Populli nuk i dinë këto gjëra sepse nuk tregojnë udheheqësit tanë, por duhet ta kuptoj nga evropianët”.

Presidenti francez, Emmanuel Macron, ka deklaruar në konferencë për media bashkë me Kryeministrin e Shqipërisë, Edi Rama, se Franca ka pezulluar procesin e liberalizmit të vizave, meqë Kosova nuk e ka mbajtur fjalën e dhënë.

“Ju kemi besuar për çështjen e vizave, çështja është pezulluar nga ana e Francës, fjala nuk po mbahet pres të angazhohen dy palët. Është kusht i paqes në të gjithë zonën”, ka deklaruar Macron.

Ai ishte i prerë në qasjen që ka Parisi në dialogun mes Kosovës dhe Serbisë, ku ka kërkuar respektimin sa më të shpejtë të planit franko-gjerman për normalizimin e marrëdhënieve, zhvillimin sa më të shpejtë të zgjedhjeve në komunat veriore, si edhe njohjen e asociacionit nga pala kosovare.

“Presim nga Kosova dhe Serbia, riorganizimin e zgjedhjeve në komunat veriore, pjesëmarrja e serbëve, njohjen e asociacionit nga Kosova. Pres që Vuçiç të jetë përgjegjës, pres të njëjtën gjë nga Osmani dhe Kurti”, pohoi.

Macron shtjelloi se po ndjek me vigjilencë zhvillimet e tensioneve mes Kosovës dhe Serbisë dhe se ai vetë, nga presidenti serb, Aleksandar Vuçiç, pret që të dënojë aktin e sulmit në veri të Kosovës, ku i vrarë mbeti një polic kosovar.

Kosovës, për dallim nga shtetet e tjera të rajonit, i janë dashur 12 vjet nga lansimi i dialogut për liberalizimin e vizave deri në lëvizjen e lirë në zonën Schengen.

Procesi i liberalizimit të vizave për Kosovën nga ana e Parlamentit Evropian ka zgjatur më së gjati në historinë e procesit të liberalizimit të vizave, kjo pasi që shteteve të tjera të Ballkanit Perëndimor iu deshën 2 deri në 3 vjet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.